भारतको मध्यप्रदेशस्थित इन्दौरमा एक विवाहित महिला घरबाट सुनचाँदीका गरगहना र नगदसहित बेपत्ता भएको घटना सार्वजनिक भएको छ। वाणगंगा प्रहरी थाना क्षेत्रकी ती महिला अचानक सम्पर्कविहीन भएपछि परिवारले प्रहरीमा उजुरी दर्ता गरेको थियो।
परिवारका सदस्यका अनुसार महिला हराएपछि घरमा राखिएको सुनचाँदीका गरगहना र नगदसमेत नभेटिएपछि शंका उत्पन्न भएको थियो। उजुरीपछि प्रहरीले अनुसन्धान अघि बढाएको थियो। घटनाबारे जानकारी दिँदै एसीपी रुबिना मिजबानीले प्रारम्भिक चरणमा पति र परिवारका अन्य सदस्यसँग बयान लिइएको बताइन्। बयानमा केही असंगति देखिएपछि प्रहरीले प्राविधिक अनुसन्धान सुरु गरेको उनले जानकारी दिइन्।
प्राविधिक विश्लेषणका क्रममा महिलाको अन्तिम लोकेशन भोपालमा देखिएपछि इन्दौर प्रहरीको टोली त्यहाँ खटिएको थियो। प्रहरी टोलीले उनलाई सुरक्षित अवस्थामा फेला पारी इन्दौर फर्काएको जनाएको छ।
सोधपुछका क्रममा महिलाले लामो समयदेखि श्रीमान्बाट घरेलु हिंसा भोग्दै आएको दाबी गरेकी छन्। यसैक्रममा उनको राकेश जाटव नामक एक युवकसँग चिनजान भएको खुलेको छ। प्रहरीले राकेश पूजापाठ तथा तान्त्रिक क्रियाकलापमा संलग्न व्यक्ति भएको जनाएको छ।
महिलाको भनाइ अनुसार घरेलु समस्या समाधान गरिदिने आश्वासन दिँदै राकेशसँग भेटघाट बढ्दै गएको र पछि सम्बन्ध निकट भएको थियो। घरेलु तनावका कारण आफूले राकेशसँगै बस्ने निर्णय गरेको उनले बयानमा उल्लेख गरेकी छन्।
प्रहरीले राकेशले तान्त्रिक अभ्यासको नाममा मानिसहरूलाई प्रभावमा पार्ने गरेको प्रारम्भिक सूचना प्राप्त भएको जनाएको छ। महिलालाई प्रलोभन देखाएर लगिएको हो वा मानसिक रूपमा प्रभावित बनाइएको हो भन्ने विषयमा अनुसन्धान जारी रहेको प्रहरीले जनाएको छ।
घटनाका सम्बन्धमा विभिन्न पक्षबाट छानबिन भइरहेको र आवश्यक कानुनी प्रक्रिया पूरा भएपछि थप कारबाही गरिने प्रहरीले जनाएको छ।
