अस्ट्रेलियामा १६ वर्षमुनिका बालबालिकालाई सामाजिक सञ्जाल प्रयोगमा प्रतिबन्ध
अस्ट्रेलियाले १६ वर्ष मुनिका बालबालिकालाई कुनै पनि सामाजिक सञ्जाल प्रयोग गर्न नपाइने प्रावधानसहितको नयाँ कानुन बुधबारदेखि लागू गरेको छ। नयाँ व्यवस्था अनुसार बालबालिकाहरूले फेसबुक, इन्स्टाग्राम, टिकटक, युट्युब, एक्स, थ्रेड्स, स्न्यापच्याट, रेडिट, ट्वीच र किकजस्ता १० सामाजिक सञ्जाल प्रयोग गर्न पाउने छैनन्।
रोयटर्सका अनुसार यस निर्णयलाई बालबालिकाको सुरक्षातर्फ गरिएको महत्वपूर्ण कदमका रूपमा अभिभावकहरूले स्वागत गरेका छन्। प्रधानमन्त्री एन्थोनी अल्बानिजले यो दिनलाई “अस्ट्रेलियाली अभिभावकका लागि गर्वको क्षण” भन्दै यसले विश्वभर असर पार्न सक्ने बताए। उनका अनुसार सामाजिक सञ्जालको अत्यधिक प्रयोगले सिर्जना गरिरहेकाबिविध सामाजिक तथा सांस्कृतिक चुनौती हटाउन यो कदम आवश्यक देखिएको हो।
सरकारले बालबालिकालाई सामाजिक सञ्जालबाट टाढा राखेर खेलकुद, संगीत, अध्यापनजस्ता सिर्जनात्मक तथा स्वास्थ्यकर गतिविधिमा सहभागी गराउने उद्देश्य राखेको जनाएको छ।
नियम कार्यान्वयनमा कडाइका लागि सरकार स्वयंले जिम्मेवारी लिने भए पनि उल्लङ्घन भए बालबालिका वा अभिभावकलाई सजाय नहुने तर सम्बन्धित प्लेटफर्महरूलाई कठोर कारबाही गरिने चेतावनी दिएको छ। प्रतिबन्धित उमेर समूहका बालबालिकालाई पहुँच दिन पाए सामाजिक सञ्जाल कम्पनीलाई करिब ५ करोड अष्ट्रेलियन डलरसम्म जरिवाना हुन सक्छ।
यसका लागि प्लेटफर्महरूले नयाँ खाता बनाउँदा प्रयोगकर्ताको उमेर पुष्टि गर्न सेल्फीमार्फत उमेर अनुमान प्रणाली, आवश्यक परे परिचयपत्र वा बैंक विवरणजस्ता कडा प्रमाण माग्नुपर्ने व्यवस्था हुनसक्ने सरकारको भनाइ छ।
कानुन लागू नहुँदै नै झण्डै १० लाख बालबालिकाले ‘गुड बाइ’ भन्दै आफ्ना अकाउन्टहरूमा अन्तिम पोस्ट गरेका रोयटर्सले उल्लेख गरेको छ। यद्यपि केहीले यस कदमको विरोध पनि व्यक्त गरेका छन्। अध्ययनअनुसार ८ देखि १५ वर्ष उमेरका करिब ८६ प्रतिशत अष्ट्रेलियन बालबालिकाले सामाजिक सञ्जाल प्रयोग गर्दै आएका थिए।
