जनकपुरधाम — नेपाली कांग्रेसले सीमावर्ती क्षेत्रमा दैनिक उपभोगका वस्तुमा अनिवार्य भन्सार शुल्क लगाउने सरकारी निर्णयप्रति आपत्ति जनाउँदै उक्त निर्णय तत्काल फिर्ता लिन माग गरेको छ। कांग्रेसले जारी गरेको प्रेस नोटमा यस्तो निर्णयले विशेषगरी मधेश क्षेत्रका सर्वसाधारण, मजदुर, साना किसान तथा न्यून आय भएका परिवारलाई प्रत्यक्ष असर पार्ने उल्लेख गरिएको छ।
खुला सीमाको कारण भारतबाट सस्तो मूल्यमा वस्तु ल्याएर जीवन निर्वाह गर्दै आएका नागरिकमाथि थप आर्थिक भार पर्ने कांग्रेसको भनाइ छ। सानो परिमाणमा ल्याइने वस्तुमा कर लगाउँदा जनताको क्रयशक्ति कमजोर भई गरिबी झन् बढ्ने जोखिम रहेको पनि प्रेस नोटमा जनाइएको छ।
कांग्रेसले दैनिक उपभोगका वस्तुमा भन्सार दर घटाउन वा छुट दिन, मधेश प्रदेशका लागि विशेष राहत प्याकेज लागू गर्न तथा इन्धन मूल्य नियन्त्रणका लागि पारदर्शी प्रणाली अपनाउन सरकारसँग माग गरेको छ।
कांग्रेसका अनुसार राजस्व संकलन राज्यको दायित्व भए पनि जनताको जीवनस्तर संरक्षणलाई प्राथमिकता दिनुपर्ने भएकाले सरकारले उक्त निर्णय पुनर्विचार गर्न आवश्यक रहेको छ।
