महोत्तरीको सोनमा गाउँपालिकामा चोरी गर्न आएका व्यक्तिहरूको प्रतिवाद गर्दा एक दम्पती गोली लागेर घाइते भएका छन्।मंगलबार राति सोनमा गाउँपालिका–३ स्थित खखना दक्षिणबारी टोलमा भएको घटनामा ५ देखि ६ जनाको समूहमा आएका लुटेराहरूले स्थानीय २७ वर्षीय रामईश्वर यादवको घरमा प्रवेश गरी चोरी गर्ने प्रयास गरेका थिए।घरभित्र अपरिचित व्यक्तिहरू प्रवेश गरेको थाहा पाएपछि रामईश्वर यादव र उनकी २२ वर्षीया श्रीमती किरण यादवले प्रतिवाद गरेका थिए। प्रतिरोधका क्रममा लुटेरा समूहले उनीहरूमाथि गोली प्रहार गरेको प्रहरीले जनाएको छ।गोली लागेर घाइते भएका दुवै जनालाई तत्काल उद्धार गरी प्रारम्भिक उपचार गरिएको थियो। थप उपचारका लागि उनीहरूलाई जनकपुरस्थित अस्पताल पठाइएको छ।घटनापछि पुगेको प्रहरी टोलीले घटनास्थलको खानतलासी गर्दा एक थान गोलीको खोका बरामद गरेको छ। जिल्ला प्रहरी कार्यालयका अनुसार घटनामा संलग्न व्यक्तिहरूको पहिचान हुन सकेको छैन।फरार रहेका अभियुक्तहरूको खोजी कार्य तीव्र पारिएको तथा घटनाबारे थप अनुसन्धान भइरहेको प्रहरीले जनाएको छ।
