सिरहा नगरपालिकाको लेखा शाखामा मंगलबार दुई जना वडाध्यक्षले तालाबन्दी गरेका छन्। कार्यपालिका बैठक तत्काल बोलाउन, विकास योजनाहरू संशोधन गर्न तथा प्रमुख प्रशासकीय अधिकृतलाई नियमित रूपमा कार्यालयमा उपस्थित गराउन माग गर्दै वडा नम्बर–२ का अध्यक्ष राकेशकुमार यादव तथा वडा नम्बर–६ का अध्यक्ष इन्द्रजित यादवले तालाबन्दी गरेका हुन्।
वडाध्यक्षहरूले नगरपालिकाको प्रशासनिक तथा विकास निर्माणसम्बन्धी कार्य प्रभावकारी रूपमा सञ्चालन हुन नसकेको आरोप लगाएका छन्। उनीहरूका अनुसार लामो समयदेखि कार्यपालिका बैठक नियमित रूपमा नबस्दा महत्वपूर्ण निर्णयहरू प्रभावित भएका छन् भने विकास योजनाको कार्यान्वयनमा समेत समस्या उत्पन्न भएको छ।
उनीहरूले प्रमुख प्रशासकीय अधिकृतको नियमित अनुपस्थितिका कारण सेवाप्रवाह र विकास निर्माणका काममा प्रत्यक्ष असर परेको दाबी गर्दै आफ्ना मागहरू सम्बोधन नभएसम्म दबाबमूलक कार्यक्रम जारी राख्ने चेतावनी दिएका छन्।
यता, नगर प्रमुख डा. नवीनकुमार यादवले प्रमुख प्रशासकीय अधिकृत विनयकुमार सोनुले कार्यालयको जिम्मेवारीभन्दा राजनीतिक गतिविधिमा बढी ध्यान दिएको आरोप लगाएका छन्। उनले प्रमुख प्रशासकीय अधिकृत नियमित रूपमा कार्यालयमा उपस्थित नभएको र आफ्नो सरुवाको प्रक्रिया अघि बढेपछि केही वडाध्यक्षहरूलाई उक्साएर तालाबन्दी गराएको दाबी गरेका छन्।
घटनाबारे प्रतिक्रिया लिन प्रमुख प्रशासकीय अधिकृत विनयकुमार सोनुसँग सम्पर्क गर्ने प्रयास गरिए पनि उनको मोबाइल फोन बन्द रहेको जनाइएको छ।
