जनकपुरधाम । महोत्तरीको मटिहानीस्थित लक्ष्मीनारायण मन्दिरका मानमहन्थ जगन्नाथ दास वैष्णव बैंकिङ कसुर मुद्दामा पक्राउ परेका छन्। लामो समयदेखि फरार रहेका उनलाई महोत्तरी प्रहरीले मटिहानीबाट नियन्त्रणमा लिएको हो।
प्रहरीका अनुसार नेकपा एमालेका मधेश प्रदेश सभा सदस्य दीपेन्द्र ठाकुरको जाहेरीका आधारमा उनलाई पक्राउ गरिएको हो। जिल्ला प्रहरी कार्यालयका प्रहरी निरीक्षक विश्वम्भरप्रसाद साहका अनुसार वैष्णवविरुद्ध एक करोड तीस लाख रुपैयाँ बिगो दाबी गरिएको छ।
पक्राउ परेका वैष्णवलाई आवश्यक कारबाहीका लागि जिल्ला प्रहरी कार्यालय धनुषा पठाइएको छ, जहाँ उनीविरुद्ध पहिले नै जाहेरी दर्ता भइसकेको थियो। उनीहरूबीच रकम लेनदेनको वास्तविक प्रयोजन भने हालसम्म खुल्न सकेको छैन।
यसअघि पनि वैष्णव रुपन्देहीमा सहायक प्रमुख जिल्ला अधिकारीको किर्ते हस्ताक्षर गरी ७० लाख रुपैयाँ निकालेको आरोपमा पक्राउ परेका थिए।साभार-नेपाल प्रेस डटकम बाट
