रौतहट जिल्लामा अन्तरजातीय सम्बन्धको विषयलाई लिएर तनाव उत्पन्न भएको भन्दै गृह मन्त्रालयमा उजुरी दर्ता गरिएको छ। यादव समुदायकी एक युवती र चमार समुदायका एक युवक उमेर पुगेर घरबाट भागेको घटनापछि केटा पक्षका आफन्तमाथि कुटपिट गरिएको आरोप लगाइएको हो।
प्राप्त जानकारीअनुसार, युवक पक्षका मामा घरतर्फका नाना, नानी तथा माइजूमाथि केटी पक्षसँग सम्बन्धित केही व्यक्तिहरूले सामूहिक रूपमा आक्रमण गरेको आरोप उजुरीमा उल्लेख गरिएको छ। पीडित पक्षले घटनालाई “अपहरण शैलीमा गरिएको कुटपिट” भन्दै दोषीमाथि कानुनी कारबाहीको माग गरेका छन्।
गृह मन्त्रालयमा दर्ता गरिएको निवेदनमा जातीय विभेद र दलित समुदायमाथिको हेपाहा व्यवहार अझै समाजमा विद्यमान रहेको उल्लेख गरिएको छ। “आजको समयमा आफूलाई ठूलो जातको सम्झेर दलित समुदायलाई हेप्ने मानसिकता त्याग्नुपर्छ,” भन्दै पीडित पक्षले सामाजिक समानता र न्यायको माग गरेका छन्।
उक्त घटनापछि सामाजिक सञ्जालमा पनि बहस चुलिएको छ। धेरैले अन्तरजातीय विवाहलाई स्वीकार गर्न समाज अझै तयार नभएको टिप्पणी गरिरहेका छन् भने केहीले घटनाको निष्पक्ष छानबिन गरी दोषीलाई कारबाही गर्न माग गरेका छन्।
निवेदनमा संलग्न पक्षले “जय चमार, नमो बुद्धाय” भन्ने नारासहित दलित समुदायको सम्मान र अधिकारको पक्षमा आवाज उठाएका छन्। अहिले घटनाबारे सम्बन्धित निकायले अनुसन्धान प्रक्रिया अघि बढाउने तयारी गरेको बताइएको छ।
