जिल्ला प्रशासन कार्यालय सप्तरी ले विवाह, चाडपर्व तथा विभिन्न सांस्कृतिक कार्यक्रममा अत्यधिक ठूलो स्वरमा बाजा तथा डिजे बजाउँदा ध्वनि प्रदूषण बढेको भन्दै त्यसलाई नियन्त्रण गर्न सम्बन्धित सबै पक्षलाई आग्रह गरेको छ।
सहायक प्रमुख जिल्ला अधिकारी नरेश कुमार यादव द्वारा जारी सूचनामा सार्वजनिक बाटो तथा बस्ती क्षेत्रमा ठूलो आवाजमा बाजा बजाउँदा मानवीय स्वास्थ्य, विद्यार्थीहरूको अध्ययन वातावरण तथा सार्वजनिक शान्ति सुव्यवस्थामा असर परेको विषयमा व्यापक जनगुनासो आएको उल्लेख गरिएको छ।
गृह मन्त्रालयको गुनासो व्यवस्थापन शाखाबाट प्राप्त पत्रको आधारमा जिल्ला प्रशासन कार्यालयले विवाह, चाडपर्व तथा अन्य सांस्कृतिक कार्यक्रम शान्तिपूर्ण वातावरणमा सञ्चालन गर्न आग्रह गरेको हो। सूचनामा आ–आफ्नो घर वा कार्यक्रम स्थलभित्र अन्य व्यक्तिलाई असर नपर्ने गरी मात्र बाजा तथा डिजे प्रयोग गर्न अनुरोध गरिएको छ।
प्रशासनले ध्वनि प्रदूषण नियन्त्रण गर्दै सामाजिक सद्भाव र शान्ति सुव्यवस्था कायम राख्न सबै नागरिकलाई जिम्मेवार बन्न आग्रह गरेको छ।
