काठमाडौं । मधेश पुस्तकालय तथा अनुसन्धान केन्द्रका संरक्षक तथा राजनीतिक अभियन्ता आभाष गुरु ले मधेशलाई सशक्त बनाउन नेपाली सेनामा मधेशी समुदायको समूहगत प्रवेश आवश्यक रहेको बताएका छन् । उनले शनिबार सामाजिक सञ्जालमार्फत आफ्नो धारणा सार्वजनिक गर्दै मधेशी समुदायको सेनामा अर्थपूर्ण र समावेशी सहभागिता सुनिश्चित गर्न सरकारलाई ध्यानाकर्षण गराएका हुन् ।
उनले दोस्रो मधेश आन्दोलनपछि २०६४ फागुन १६ गते नेपाल सरकार र संयुक्त लोकतान्त्रिक मधेशी मोर्चाबीच भएको आठबुँदे सम्झौताको स्मरण गर्दै उक्त सहमतिमा नेपाली सेनालाई राष्ट्रिय स्वरूप दिने तथा मधेशीसहित सबै समुदायको समानुपातिक समावेशी र समूहगत प्रवेश सुनिश्चित गर्ने उल्लेख रहेको बताएका छन् ।
गुरुले वर्तमान सरकार मधेशको व्यापक जनसमर्थनबाट बनेको दाबी गर्दै विगतका सम्झौताहरू कार्यान्वयन गरेर मतदाताप्रति जिम्मेवार बन्नुपर्ने बताएका छन् । साथै, अब हुने संविधान संशोधनसम्बन्धी बहसमा पनि नेपाली सेनामा मधेशीहरूको समूहगत प्रवेश सुनिश्चित गर्ने व्यवस्था समेटिनुपर्ने उनको माग छ ।
उनले केवल नाराले मात्रै मधेश सशक्त नहुने उल्लेख गर्दै व्यवहारिक र ऐतिहासिक निर्णयमार्फत मधेशलाई बलियो बनाउनुपर्ने धारणा राखेका छन् । प्रधानमन्त्रीले यस विषयलाई प्राथमिकतामा राख्नुपर्ने उल्लेख गर्दै उनले विगतका सरकारहरूले केवल औपचारिक काम मात्रै गर्दै आएको टिप्पणी पनि गरेका छन् ।
यस मुद्दालाई जेनजी अगुवा, मधेशी सांसद तथा सरोकारवाला पक्षहरूले गम्भीर रूपमा उठाउनुपर्ने र सशक्त आवाजसहित अघि बढ्नुपर्ने आवश्यकता रहेको उनको भनाइ छ ।
