जनकपुरधाम । बंगलादेशमा हिन्दू समुदायमाथि भइरहेको हिंसा तथा हत्याको घटनाको घोर भर्त्सना गर्दै जनकपुरधाममा आज विरोध प्रदर्शन गरिएको छ। विभिन्न हिन्दू संघ–संस्था तथा स्थानीय समूहहरूको सहभागितामा आयोजित प्रदर्शनमा बंगलादेशी हिन्दूहरूलाई न्याय दिनुपर्ने माग गरिएको छ।
प्रदर्शनकारीहरूले बंगलादेशमा अल्पसंख्यक हिन्दूमाथि भइरहेको भनिएको अत्याचार तत्काल रोक्न अन्तर्राष्ट्रिय समुदायले ध्यान दिनुपर्ने माग गर्दै नाराबाजी गरेका थिए। उनीहरूले नेपाल सरकारले पनि यस विषयमा कूटनीतिक पहल गर्नुपर्ने माग राखेका छन्।
प्रदर्शन जानकी मन्दिरबाट सुरु भई जनक चौक, राम चौक, सोनरपट्टी हुँदै पुनः जनक चौक पुगेको थियो। जनक चौकमा बंगलादेशी मुस्लिम आतङ्कवादीको प्रतीकात्मक पुतला दहन गरिएको थियो। त्यसपछि शिव चौक र भानु चौकमा टायर बाल्दै प्रदर्शन समापन गरिएको थियो।
प्रदर्शनका क्रममा केही समूहले बंगलादेशी हिन्दूलाई न्याय दिनुपर्ने, नेपालमा रहेको बंगलादेशी दूतावास बन्द गर्नुपर्ने, मुस्लिम आयोग खारेज गर्नुपर्ने तथा नेपाललाई हिन्दू राष्ट्र घोषणा गर्नुपर्ने लगायतका मागसहित नाराबाजी गरेका थिए।कार्यक्रमका क्रममा सुरक्षा निकायको उपस्थिति रहेको थियो भने स्थिति नियन्त्रणमा रहेको जिल्ला प्रहरी कार्यालयले जनाएको छ। कुनै अप्रिय घटना नभएको र प्रदर्शन शान्तिपूर्ण रूपमा सम्पन्न भएको बताइएको छ।स्थानीय आयोजकहरूले बंगलादेशमा हिन्दू समुदायको सुरक्षा सुनिश्चित नभएसम्म आफूहरूको आवाज उठिरहने चेतावनी दिएका छन्।
