काठमाडौं । प्रधानमन्त्री पुष्पकमल दाहाल ‘प्रचण्ड’ ले भारतीय समकक्षी नरेन्द्र मोदीलाई बधाई दिएका छन् ।
मोदीले आउँदो शनिवार तेस्रोपटक प्रधानमन्त्रीको शपथ ग्रहण गर्दैछन् । भारतीय जनता पार्टी (भाजपा) नेतृत्वको एनडिए गठबन्धनले मोदीलाई प्रधानमन्त्री बनाउने सहमति गरिसकेको छ ।यसपछि प्रधानमन्त्री प्रचण्डले मोदीलाई फोन गरेर बधाई दिएका हुन् । मोदीले प्रधानमन्त्री प्रचण्डसँग कुराकानी भएको उल्लेख गर्दै आफूलाई खुसी लागेको बताएका छन् ।
“उहाँ (प्रचण्ड) को न्यानो शुभकामनाको लागि धन्यवाद छ,” मोदीले भनेका छन् । उनले भारत-नेपालबीच बहुआयामिक सम्बन्ध भएको उल्लेख गर्दै त्यसलाई निरन्तरता दिनेबारे पनि कुराकानी भएको बताएका छन् । “हाम्रो सम्बन्धमा सकारात्मक गतिलाई कायम राख्न सहमत भएका छौँ,” मोदीले भनेका छन् ।
भर्खरै सम्पन्न लोकसभा चुनावमा मोदीको दल भाजपाले २४० सिट जितेको छ । सरकार गठनका लागि कम्तिमा २७२ सांसदको समर्थन चाहिन्छ । भाजपाले बहुमत नल्याए पनि मोदी एनडिए गठबन्धनका सहायक दलहरूको समर्थनमा प्रधानमन्त्री बन्दैछन् ।
