जिल्ला प्रशासन कार्यालय सिराहा ले जिल्लाभित्र बढ्दो ध्वनि प्रदूषण तथा डिजे बाजाका कारण समाजमा आतंक सिर्जना भएको गुनासो आएपछि नियन्त्रणका लागि कडाइ गर्ने भएको छ।
सहायक प्रमुख जिल्ला अधिकारी चेतराज बराल द्वारा जारी पत्रमा गृह मन्त्रालयको गुनासो व्यवस्थापन शाखाबाट प्राप्त निर्देशनअनुसार जिल्लाका सबै १७ वटै स्थानीय तहलाई प्रभावकारी अनुगमन गरी आवश्यक कारवाही गर्न अनुरोध गरिएको उल्लेख छ।
जिल्ला प्रशासन कार्यालयले यसअघि पनि विभिन्न समयमा डिजे बाजा नियन्त्रण सम्बन्धी सूचना तथा पत्राचार जारी गरिसकेको जनाएको छ। तर पछिल्लो समय डिजे बाजा बजाएर सार्वजनिक शान्ति भंग गर्ने, ध्वनि प्रदूषण फैलाउने तथा समाजमा त्रास सिर्जना गर्ने घटनाबारे गुनासो बढेपछि पुनः कडाइ गर्न निर्देशन दिइएको हो।
पत्रमा सम्बन्धित पालिकाहरूलाई आफ्ना क्षेत्रमा डिजे बाजाको प्रयोग, उच्च ध्वनिमा हुने कार्यक्रम तथा सार्वजनिक असर पर्ने गतिविधिमाथि निगरानी बढाउन भनिएको छ। साथै, नियम उल्लंघन गर्नेहरूमाथि आवश्यक कानुनी कारवाही गर्न पनि आग्रह गरिएको छ।यसैगरी, बोधार्थस्वरूप जिल्ला प्रहरी कार्यालय सिराहा लाई पनि यस्ता गतिविधि नियन्त्रणमा लिई आवश्यक कारवाही गर्न निर्देशन दिइएको छ।स्थानीयवासीहरूले लामो समयदेखि विवाह, धार्मिक कार्यक्रम तथा विभिन्न उत्सवमा अत्यधिक आवाजमा बजाइने डिजे बाजाका कारण विद्यार्थी, बिरामी, वृद्धवृद्धा तथा सर्वसाधारण प्रभावित हुँदै आएको गुनासो गर्दै आएका छन्।
