६ प्रतिवेदन पारित गर्दै सकियो भौतिकवादी समाज नेपालको सम्मेलन, अध्यक्षमा श्रमजीवि

भौतिकवादी समाज नेपालको अध्यक्षमा वैद्यनाथ श्रमजीवि चयन भएका छन् । चैत्र ८ र ९ गते चितवनको माडी–४, खैरहनीस्थित कृषि पाठशालामा सञ्चालित प्रथम राष्ट्रिय सम्मेलनबाट वीरगञ्ज निवासी पूर्व शिक्षकसमेत रहेका श्रमजीविको अध्यक्षतामा १९ सदस्यीय राष्ट्रिय कार्यसमिति र ६ सदस्यीय सल्लाहकार समिति चयन भएको हो ।

दुई दिन चलेको भेलाले अध्यक्षबाट प्रस्तुत संस्थाको वैचारिक, सांगठनिक, आर्थिक, विधान, तीन वर्षे कार्ययोजना तथा सांस्कृतिक विभाग समितिका संयाेजक डा. रामदेव पाण्डेले तयार पारेको सांस्कृतिक प्रतिवेदन पनि पारित गरेको छ ।

प्रथम राष्ट्रिय भेलाले संस्थाको सचिवमा रामदेव पाण्डेलाई चयन गरिएको छ भने अन्य १७ जना केन्द्रीय सदस्य चयन भएका छन् । जसअन्तरगत चितवनबाट ओमनाथ पाण्डे, भगवती अर्याल र प्रभास भुल सी रहेका छन् ।

त्यस्तै शिवकुमार महरा, भोगीराज यादव, रोशन जनकपुरी, सावित्रा सिवाकोटी, बालकृष्ण दियाली, अशोक स्मित, सुरज राई, भागिरथी प्रकृति, शमसेर, फुलमती, रामचन्द्र त्रिपाठी, पदम प्रसाद पोख्रेल, सुदीप गहतराज रहेका छन् । सल्लाहकारहरुमा चितवनका सन्देश पौडेल सहित रामरिझन यादव, दर्शन किराँती, किशन शर्मा, प्रमोद धिताल र धर्मराज गुरुङ रहेका छन् ।

सबैखाले धर्मको आडमा समाजमा विद्यमान अन्धविश्वास, कुसंस्कार र पाखण्डी प्रवृत्तिविरुद्ध सचेतनामा सक्रिय सो संस्थाले “अन्त्य गरौँ अन्धविश्वास र रूढीवाद, आत्मसात् गरौँ वैज्ञानिकता र भौतिकवाद” भन्ने नारासहित माडीमा राष्ट्रिय सम्मेलन सम्पन्न गरेको हो ।