२३ कात्तिक, काठमाडौं । देशका सहरहरूमा वायु प्रदूषण तीव्र रूपमा बढ्दै गएको छ। वातावरण विभागका अनुसार आज बिहान नौ बजेसम्म सुर्खेत देशकै सबैभन्दा प्रदूषित सहर बनेको छ, जहाँ हावामा प्रदूषणको मात्रा १७० पीपीएम पुगेको छ।
राजधानी उपत्यकाको अवस्था पनि चिन्ताजनक छ। भक्तपुरमा १३२ पीपीएम, काठमाडौंको शंखपार्कमा १२३ पीपीएम र ललितपुरको खुमलटारमा १०५ पीपीएम मापन गरिएको छ। हिजोको तुलनामा शंखपार्कको वायु प्रदूषण एकै दिनमा दोब्बर पुगेको विभागले जनाएको छ।
विशेषज्ञका अनुसार सुक्खा मौसम, खेतमा पराल जलाउने चलन, र भारततिर बढेको धुवाँ नेपालसम्म आइपुगेका कारण वायु गुणस्तर झन् बिग्रँदै गएको हो। तत्काल पानी नपर्ने र हावा नचल्ने भएकाले आगामी दिनमा अवस्था अझ खतरनाक बन्न सक्ने चेतावनी पनि दिइएको छ।
सरकार र स्थानीय निकायले प्रदूषण नियन्त्रणका प्रयास तत्काल सुरू नगरेमा स्वास्थ्य संकट थप गहिरिने चेतावनी वातावरणविद्हरूले दिएका छन्।
