जेन जेड आन्दोलनका क्रममा कार्यालय भवनमा तोडफोड र आगजनी भएपछि बन्द रहेको सुखीपुर नगरपालिकाको मुख्य कार्यालय पुनः सञ्चालन गरिएको छ। विगत एक महिनादेखि वडानं ८ मा अनौपचारिक रूपमा आंशिक सेवा दिँदै आएको नगरपालिकाले अब कार्यालयमा पूर्ण रूपमा सेवाहरू उपलब्ध गराउन थालेको सरकारी सूचनामा जनाइएको छ।
सूचना अधिकारकर्मीहरूद्वारा प्राप्त जानकारीअनुसार प्रशासनिक सेवा, कागजी काम र नागरिक सेवा पुनः सामान्य रूपमा सुरु गरिएको छ। नगरपालिकाले किसान, व्यापारी तथा सर्वसाधारणलाई आवश्यक कार्यका लागि सम्बन्धित शाखामा सम्पर्क गर्न आग्रह गरेको छ।
सूचनाअनुसार, पंजिकरण सेवा र राजस्व उपशाखासम्बन्धी कार्यहरू वडानं ८ को कार्यालयबाट सञ्चालन हुनेछन्। कृषि तथा पशुसम्बन्धी सेवाहरू सुखीपुर ग्रामीण बजारस्थित नगरपालिकाको भवनबाट सञ्चालन हुने र बाँकी सबै शाखाहरू सुखीपुर नगरपालिकाको प्रशासकीय भवनबाट सञ्चालन हुने जानकारी नगरपालिकाले दिएको छ।
मिति २०८२ असोज ८ गतेदेखि नै क्षतिग्रस्त भवनमै सेवाग्राहीहरूलाई सुविधा प्रदान गर्न सूचना सार्वजनिक गरिएको भए पनि सुखीपुर नगरपालिकाको वेबसाइटमा उक्त सूचना हालसम्म समावेश नगरिएको कारण आम जनतामा जानकारीको अभाव र असुविधा भएको जनाइएको छ। सर्वसाधारणले सम्बन्धित निकायको ध्यानाकर्षण गराउँदै तत्काल वेबसाइटमार्फत सूचना अद्यावधिक गर्न माग गरेका छन्।
