काठमाडौँ। सरकारले अटिजम भएका बालबालिकाको शिक्षालाई व्यवस्थित र पहुँचयोग्य बनाउन देशका सातै प्रदेशमा नमूना विद्यालय स्थापना गर्ने घोषणा गरेको छ।
विश्व अटिजम सचेतना दिवस (अप्रिल २) को अवसरमा शिक्षा, विज्ञान तथा प्रविधि मन्त्रालयको समन्वयमा आयोजित एक कार्यक्रममा विभिन्न मन्त्रालयका मन्त्री, सचिव तथा सरोकारवाला निकायका प्रतिनिधिहरूको सहभागितामा उक्त निर्णय गरिएको हो।
शिक्षा, विज्ञान तथा प्रविधिमन्त्री सस्मित पोखरेलले अटिजम भएका बालबालिकालाई सहज, सरल र प्रभावकारी सेवा उपलब्ध गराउने उद्देश्यले नमूना विद्यालय स्थापना गर्न लागिएको जानकारी दिनुभयो।
उक्त कार्यक्रममा शिक्षामन्त्री पोखरेलको अध्यक्षता तथा स्वास्थ्य तथा जनसङ्ख्यामन्त्री निशा मेहताको उपस्थितिमा अटिजम तथा बौद्धिक अपाङ्गता भएका बालबालिकाका लागि प्रत्येक प्रदेशमा सुविधासम्पन्न आवासीय विद्यालय सञ्चालन गर्ने योजना पनि सार्वजनिक गरिएको छ।
यस कार्यक्रमलाई प्रभावकारी रूपमा कार्यान्वयन गर्न विभिन्न मन्त्रालयबीच समन्वय गर्ने निर्णय गरिएको छ भने अवधारणापत्र तयार पार्न प्राविधिक समिति गठन गरिएको समेत जनाइएको छ।
