काठमाडौँ । देशभर १० लाख १६ हजार ७ सय ५४ जना मतदाता थपिएका छन्। आसन्न प्रतिनिधिसभा निर्वाचनको तयारीबारे सिंहदरबारमा सोमबार जारी सर्वपक्षीय छलफलमा निर्वाचन आयोगका सहसचिव तथा प्रवक्ता नारायणप्रसाद भट्टराईले उक्त जानकारी दिएका हुन्।
उनका अनुसार हाल प्रतिनिधिसभा सदस्य निर्वाचन प्रयोजनका लागि निर्वाचन आयोगमा दर्ता भएका राजनीतिक दलको संख्या ११४ पुगेको छ। अघिल्लो २०७९ सालको निर्वाचनमा ८७ दलले मात्र निर्वाचनमा सहभागिता जनाएका थिए। दलहरूको संख्या बढेकाले यसपटक निर्वाचनमा प्रतिस्पर्धा थप चर्किने अनुमान आयोगले गरेको छ।
भट्टराईले निर्वाचनमा प्रयोग हुने ५१ प्रकारका सामग्रीहरू पहिचान गरिसकेको जानकारी पनि दिए। तीमध्ये ३७ प्रकारका सामग्री जिल्लास्तरबाटै खरिद गरिनेछ भने बाँकी १४ प्रकारका सामग्री निर्वाचन आयोगले केन्द्रीय रूपमा खरिद गरी उपलब्ध गराउने तयारी भइरहेको छ। पित्तलको स्वस्तिक चिन्ह छाप, स्ट्याम्प प्याड र मसी, कागज, डटपेन, धागो, सियो, पिन, किला, स्टापलर, गम, लाहा, मैनबत्ती, ब्लेड, कार्बन पेपर, कैँचीजस्ता सामग्रीहरू आवश्यकताअनुसार मात्र खरिद गरिने उनले बताए।
उनले मतपेटिका र मसीको मौज्दात पर्याप्त रहेको उल्लेख गर्दै ती सामग्रीहरू थप खरिद गर्नुपर्ने अवस्था नरहेको स्पष्ट पारे। “स्रोतको मितव्ययी प्रयोग गर्दै निर्वाचन सम्पन्न गर्ने तयारी भइरहेको छ,” उनले भने।
मतदाता नामावलीको अन्तिम सूची आगामी पुस १५ गतेसम्म तयार हुने जानकारी दिँदै उनले हालसम्म मतदाताको संख्या ५.६५ प्रतिशतले वृद्धि भएको बताए। साथै निर्वाचन पर्यवेक्षणका लागि पहिलो चरणको अनुमति दिइसकिएको र मुलुकभर निर्वाचनको अनुकूल वातावरण बनाउन सुरक्षा निकाय तथा सरकारसँग निरन्तर छलफल र समन्वय भइरहेको पनि उनले जानकारी दिए।
