बर्दिवासको पानस होटललाई “प्रदेश प्रमुखको कार्यालय” बनाएर रातारात गोप्य रूपमा सरोज यादवलाई मुख्यमन्त्रीको रूपमा सपथ गराइएको घटनाले राजनीतिक तापक्रम बढाएको छ। राष्ट्रिय मुक्ति पार्टीले यस कार्यलाई संविधान र लोकतान्त्रिक मूल्यको खुलेआम उल्लङ्घन भन्दै घोर भर्त्सना गरेको छ।
पार्टीको भनाइ छ, “प्रदेश प्रमुखले संविधानको धारा १६८(२) लाई बेवास्ता गर्दै १६८(३) को प्रयोग गरेर संघीयता र पदीय मर्यादाको अपमान गरेका छन्।” वक्तव्यमा थप भनिएको छ, “छापामार शैलीमा सपथ खुवाउने नाटकले प्रदेश प्रमुखको पद नै स्वतः समाप्त भएको छ।”
राष्ट्रिय मुक्ति पार्टीले नेपाल सरकारलाई तत्काल कार्यवाहीको माग गर्दै भनिएको छ, “जेन जेड आन्दोलनबाट बनेको सरकार पुरानै एमाले–काँग्रेसको शैली दोहोर्याउने होइन भन्ने प्रमाणका रूपमा तत्काल नयाँ प्रदेश प्रमुखमा डा. सुरेन्द्र लाभ कर्णलाई नियुक्त गर्नुपर्छ।”
पार्टीले आरोप लगाएको छ कि मधेश प्रदेशमा एमालेको “ग्राण्ड डिजाइन” अन्तर्गत अस्थिरता र सत्ताको कब्जा गर्ने षड्यन्त्र सुरु भएको छ। यसका विरुद्ध संघीय लोकतान्त्रिक गणतन्त्रको रक्षा गर्न सबै प्रदेशवासीलाई एकजुट हुन अपिल गरिएको छ।
