जल तथा मौसम विज्ञान विभागले जारी गरेको तातो दिन तथा तातो हावाको बुलेटिन अनुसार लुम्बिनी र सुदूरपश्चिम प्रदेशका तराई भू–भागमा अधिकतम तापक्रम ४० डिग्री सेल्सियस नजिक पुगेको छ। आगामी केही दिनसम्म तापक्रम अझ बढ्ने र तातो हावाको प्रभाव रहने सम्भावना रहेको विभागले जनाएको छ।
बुलेटिन अनुसार केही जिल्लामा ‘Be Prepared’ र केही क्षेत्रमा ‘Be Updated’ अवस्था घोषणा गरिएको छ। विशेषगरी तराई क्षेत्रका बासिन्दालाई स्वास्थ्यमा असर पर्न सक्ने भएकाले आवश्यक सतर्कता अपनाउन आग्रह गरिएको छ।
तातो हावाका कारण थकान, टाउको दुख्ने, चक्कर लाग्ने, डिहाइड्रेसनजस्ता समस्या देखिन सक्ने भएकाले अत्यावश्यक बाहेक दिउँसो बाहिर ननिस्कन, प्रशस्त पानी पिउन, हल्का तथा सुती कपडा लगाउन र चिसो स्थानमा बस्न सुझाव दिइएको छ।
विभागले स्थानीय तह तथा सरोकारवालालाई पूर्वतयारी गर्न र सर्वसाधारणलाई मौसम सम्बन्धी अद्यावधिक जानकारी लिन पनि अनुरोध गरेको छ।
