कपिलवस्तु । कपिलवस्तुको महाराजगञ्ज–बर्गदवा क्षेत्रमा दुई समुदायबीच उत्पन्न तनाव नियन्त्रण गर्न जिल्ला प्रशासन कार्यालयले अनिश्चितकालीन निषेधाज्ञा जारी गरेको छ।
आज बिहान मन्दिरमा भजन गाउने क्रममा भएको तोडफोडको विषयलाई लिएर हिन्दू र मुस्लिम समुदायका युवाबीच विवाद चर्किएपछि झडपको अवस्था सिर्जना भएको थियो। सम्भावित थप हिंसा रोक्न प्रशासनले आज दिउँसो २ बजेदेखि अर्को सूचना जारी नभएसम्मका लागि भेला, सभा तथा जुलुसमा प्रतिबन्ध लगाउँदै निषेधाज्ञा लागू गरेको जनाएको छ।
प्रशासनका अनुसार निषेधाज्ञा पूर्वमा बर्गदी पुल, पश्चिममा बहादुरगञ्ज चोक, उत्तरमा महाराजगञ्ज बजार र दक्षिणमा हर्दौनासम्म लागू गरिएको छ।
राम नवमीका अवसरमा मन्दिरमा पूजा–पाठ तथा इदको अवसरमा मस्जिदमा नमाज पढ्ने क्रममा दुवै पक्षबाट माइकको आवाज चर्किएको विषयमा विवाद बढ्दै झडपमा परिणत भएको जनाइएको छ।
झडपका क्रममा ढुंगा प्रहार हुँदा पाँच जना सामान्य घाइते भएका निमित्त प्रमुख जिल्ला अधिकारी भविश्वर घिमिरेले जानकारी दिए। निषेधाज्ञा लागू भएपछि अवस्था अहिले नियन्त्रणमा आएको प्रशासनले जनाएको छ।
