जनकपुरधाम । धनुषा निर्वाचन क्षेत्र नम्बर ३ मा चुनावी समीकरण अचानक फेरिएको छ। राष्ट्रिय मुक्ति पार्टी नेपाल (रामुपा) का तर्फबाट उम्मेदवारी दिएका राजीव झाले राष्ट्रिय स्वतन्त्र पार्टी (रास्वपा) का उम्मेदवार मनिष झालाई समर्थन गर्ने निर्णय गरेका छन्।
झाका सहयोगी कृष्णा साहका अनुसार राजीव झाले मनिष झालाई सघाउने सहमति गरिसकेका छन्। स्वयं राजीव झाले पनि रास्वपाको ‘घण्टी’ चिन्हलाई समर्थन गरेको पुष्टि गरेका छन्। जाँतो छापबाट सक्रिय प्रचार गरिरहेका झा अब घण्टीको पक्षमा उभिने भएका हुन्।
यद्यपि, रामुपाका महामन्त्री अनिल कुमार महासेठले भने पार्टीगत रूपमा रास्वपासँग कुनै सहमति नभएको बताएका छन्। तर राजीव झाले व्यक्तिगत रूपमा समर्थन गर्ने निर्णय लिएको स्पष्ट पारेका छन्। न्यूजब्यूरोसँग कुरा गर्दै उनले रास्वपामा औपचारिक प्रवेशको तयारीसमेत भइरहेको जानकारी दिए।
उनले भने, “पहिलो पटक देशको प्रधानमन्त्री मधेशी बन्दैछ, यसमा म किन बाधक बन्ने? केन्द्रका नेताहरूले अन्य दललाई समर्थन जनाउन थालेको गोप्य सूचना पाएपछि मैले धनुषा–३ मा मनिष झालाई सघाउने निर्णय गरेको हुँ।”
रकम लिएर समर्थन गरेको आरोप आउन सक्ने संकेत गर्दै उनले त्यसलाई अस्वीकार गर्न पार्टी प्रवेश नै गर्ने तयारी गरेको बताए। यस सम्बन्धमा बुधबार बिहान साढे ११ बजे संयुक्त पत्रकार सम्मेलनमार्फत औपचारिक घोषणा गर्ने कार्यक्रम तय गरिएको छ।
उल्लेखनीय छ, केही दिनअघि मात्र रामुपा धनुषाका अधिकांश नेताहरूले पार्टी परित्याग गरी जनता समाजवादी पार्टी (जसपा) नेपालमा प्रवेश गरेका थिए।
रास्वपाका मधेश प्रदेश आरएटी विभाग प्रमुख अम्भु प्रसाद साहले संयुक्त पत्रकार सम्मेलनमार्फत समर्थन सार्वजनिक गरिने जानकारी दिँदै यस कदमले धनुषा–३ मा रास्वपाको पक्षमा जनलहर सिर्जना हुने दाबी गरेका छन्।
