सिरहा । मधेश प्रदेश सरकार अन्तर्गत स्वास्थ्य तथा जनसंख्या मन्त्रालयको निर्देशनमा स्वास्थ्य कार्यालय सिरहाको आयोजनामा आर्थिक वर्ष २०८२/०८३ मा निःशुल्क स्थायी बन्ध्याकरण तथा लामो अवधिको परिवार नियोजन सेवा सम्बन्धी घुम्ती शिविर सञ्चालन हुने भएको छ।
स्वास्थ्य कार्यालय सिरहाद्वारा जारी सूचनाअनुसार शिविरमार्फत मिनिल्याप र भ्यासेक्टोमीजस्ता स्थायी बन्ध्याकरण सेवा तथा इम्प्लान्ट र आइयुसिडी (IUD) जस्ता लामो अवधिका परिवार नियोजन सेवा निःशुल्क प्रदान गरिनेछ। शिविरहरू २०८२ माघ २ गतेदेखि २८ गतेसम्म जिल्लाका विभिन्न अस्पताल तथा स्वास्थ्य संस्थाहरूमा सञ्चालन हुनेछन्।
कार्यतालिकाअनुसार मिर्चैया अस्पताल, फूलकुमारी महतो मेमोरियल अस्पताल कर्जन्हा, कल्याणपुर र भलुवाही स्वास्थ्य चौकी, औरही अस्पताल, नवराजपुर र भगवानपुर प्राथमिक स्वास्थ्य केन्द्र, लहान–५ स्थित आधारभूत स्वास्थ्य केन्द्र, धनगढीमाईस्थित नयनपुर अस्पताल, सुखिपुर अस्पताल तथा गोलबजारस्थित कोभिड अस्पतालमा शिविर सञ्चालन गरिनेछ।
स्वास्थ्य कार्यालयले सम्बन्धित नगरपालिका तथा गाउँपालिकालाई मातहतका निकायहरूलाई जानकारी गराई सेवाग्राहीको सहभागिता सुनिश्चित गर्न, शिविर सञ्चालन हुने स्थानीय तहले एम्बुलेन्स तथा महिला स्वास्थ्य स्वयंसेवक परिचालन गर्न अनुरोध गरेको छ। शिविर सफल बनाउन स्वास्थ्य निर्देशनालय, परिवार कल्याण महाशाखा, फूलकुमारी महतो मेमोरियल अस्पताल कर्जन्हा तथा सुनौलो परिवार नेपालले आवश्यक सहयोग गर्ने जनाइएको छ।
