जनकपुरधाम । काठमाडौंमा नेपाली कांग्रेसका वरिष्ठ नेता विमलेन्द्र निधि तथा मधेश प्रदेशका मुख्यमन्त्री कृष्णप्रसाद यादवमाथि भएको दुर्व्यवहारको विरोधमा नेपाली कांग्रेसका कार्यकर्ताहरूले आइतबार जनकपुरधाममा विरोध प्रदर्शन गरेका छन्।
प्रदर्शनका क्रममा कार्यकर्ताहरूले जनकपुरधामको पिडारी चोकमा चक्काजाम गर्दै भानुचोकमा नेपाली कांग्रेसका महामन्त्रीद्वय विश्वप्रकाश शर्मा र गगन थापाको पुतला दहन गरेका थिए।
प्रदर्शनमा मधेश प्रदेशका प्रमुख सचेतक कुमारकान्त झा, प्रदेश सभा सदस्य सञ्जय महतोसहित नेपाली कांग्रेस, नेविसंघ र तरुण दलका नेता–कार्यकर्ताहरूको उल्लेखनीय सहभागिता रहेको थियो।
प्रदर्शनलाई सम्बोधन गर्दै कांग्रेसका युवा नेता राकेश विक्रम साहले वरिष्ठ नेता विमलेन्द्र निधिमाथि भएको दुर्व्यवहार निन्दनीय र अस्वीकार्य रहेको बताए। उनले घटनामा संलग्न दोषीहरूलाई कडा कारबाही गर्न माग गर्दै मधेशबिना नेपाली कांग्रेसको अस्तित्व सम्भव नरहेको स्पष्ट पारे।
साहले पछिल्लो समय मधेशका नेताहरूमाथि पटक–पटक दुर्व्यवहार हुँदै आएको आरोप लगाउँदै भने, “कहिले सहमहामन्त्री महेन्द्र यादवमाथि खुकुरी प्रहार हुन्छ, कहिले विमलेन्द्र निधिजस्ता वरिष्ठ नेतामाथि दुर्व्यवहार गरिन्छ। यस्तो प्रवृत्ति तत्काल रोकिनुपर्छ।”
