काठमाडौँ — आज पर्न गएको तुलसी पूजन दिवसको अवसरमा राष्ट्रिय एकता अभियानका केन्द्रीय अध्यक्ष विनय यादवले सम्पूर्ण नेपाली दाजुभाइ तथा दिदीबहिनीहरूमा हार्दिक शुभकामना व्यक्त गर्नुभएको छ।
शुभकामना सन्देशमा अध्यक्ष यादवले तुलसीलाई सनातन संस्कृतिमा पवित्रता, स्वास्थ्य, नैतिकता र प्रकृति संरक्षणको प्रतीकका रूपमा स्मरण गर्दै तुलसी पूजन दिवसले समाजमा सकारात्मक ऊर्जा, धार्मिक सद्भाव र सांस्कृतिक चेतना फैलाउने विश्वास व्यक्त गर्नुभएको छ।
उहाँले भन्नुभयो,“तुलसी केवल एक धार्मिक आस्था मात्र होइन, यो हाम्रो जीवनशैली, स्वास्थ्य र वातावरणसँग गहिरो रूपमा जोडिएको अमूल्य संस्कार हो। तुलसी पूजन दिवसले प्रकृतिप्रति सम्मान, परिवारमा सद्भाव र समाजमा नैतिक मूल्यको संरक्षण गर्ने सन्देश दिन्छ।”
अध्यक्ष यादवले आधुनिक जीवनशैलीका कारण हराउँदै गइरहेका परम्परा, संस्कार र वातावरणीय चेतनालाई पुनर्जीवित गर्न यस्ता पर्वहरूको महत्वपूर्ण भूमिका रहेको उल्लेख गर्दै युवापुस्तालाई आफ्नो संस्कृति, धर्म र राष्ट्रिय पहिचानप्रति जिम्मेवार बन्न आग्रह गर्नुभयो।
उहाँले देशमा एकता, शान्ति, सद्भाव र समृद्धिको कामना गर्दै तुलसी पूजन दिवसले सबै नेपालीको जीवनमा स्वास्थ्य, सुख, समृद्धि र सकारात्मक सोचको विकास गराओस् भन्ने शुभेच्छा प्रकट गर्नुभयो।
राष्ट्रिय एकता अभियानले पनि यस पावन अवसरमा राष्ट्रिय एकता, सांस्कृतिक संरक्षण र सामाजिक सद्भावलाई अझ सुदृढ बनाउने संकल्प व्यक्त गरेको छ।
