सिरहा । सिरहा जिल्लाको सुखिपुर नगरपालिका–१० स्थित दहिपौडी बजारमा वर्षौँदेखि देखिँदै आएको एक घीनलाग्दो र लज्जास्पद समस्या अन्त्य भएको छ। खुला रूपमा विद्यालयको मुख्य गेटमै पिसाब फेर्ने प्रवृत्तिले बजारको छवि बिग्रिँदै आएको अवस्थामा स्थानीय युवाहरूको सक्रिय पहलमा सार्वजनिक सौचालय निर्माण भएपछि समस्या समाधान भएको हो।
ज० मा.वि. दहिपौडीको मुख्य गेट अगाडि खुला रूपमा दिशा–पिसाब गर्ने कार्यले विद्यार्थी, शिक्षक, अभिभावक, व्यापारी तथा बजारमा आउने ग्राहकहरूलाई लामो समयदेखि असहज बनाउँदै आएको थियो। तर अब उक्त समस्या इतिहास बनेको छ।
कुनै पनि सरकारी वा गैरसरकारी संस्था, दातृ निकायबाट सहयोग नलिइकन स्थानीयस्तरमै दहिपौडी बजार व्यवस्थापन समिति, केही व्यापारी, युवाहरू तथा समाजसेवीहरूको स्वस्फूर्त सहयोगमा सौचालय निर्माण गरिएको हो। स्थानीय युवाहरूले नेतृत्व लिएर बजारको मुहार र सामाजिक लाज बचाउने उल्लेखनीय काम गरेका छन्।
सौचालय निर्माणसँगै दहिपौडी बजारमा आउने ग्राहक, बुद्धिजीवी, व्यापारी वर्ग तथा सर्वसाधारणका लागि उचित र मर्यादित रूपमा दिशा–पिसाब गर्ने व्यवस्थापन भएको छ। आजैदेखि सार्वजनिक सौचालय प्रयोगमा ल्याइएको निर्माण समितिले जनाएको छ।
स्थानीयवासीहरूले यस पहललाई उदाहरणीय कार्य भन्दै प्रशंसा गरेका छन् र यस्ता स्वस्फूर्त सामाजिक अभियानले बजारको सरसफाइ, स्वास्थ्य र सभ्यतालाई मजबुत बनाउने विश्वास व्यक्त गरेका छन्। तस्वीरहरु –
