काठमाडौं । ओशो तपोवनका संरक्षक स्वामी आनन्द अरुणले योग, ध्यान र आयुर्वेदलाई समेट्ने छुट्टै मन्त्रालय गठन गर्न सरकारसँग माग गरेका छन्। विश्व ध्यान दिवसको अवसरमा आयोजित कार्यक्रममा बोल्दै उनले आयुर्वेदको संरक्षण र ध्यान साधकका लागि अभिभावकीय निकाय आवश्यक रहेको उल्लेख गर्दै सरकारको ध्यानाकर्षण गराए।
स्वामी अरुणले धार्मिक संस्थाबाट संकलन हुने दानमा कर लगाइनु अनुचित भएको धारणा राख्दै मुठी दानमा १५ प्रतिशत कर लाग्नु दुःखद भएको बताए। योग र ध्यानजस्ता आध्यात्मिक अभ्यासलाई राज्यबाट पर्याप्त सहयोग नपाएको भन्दै उनले असन्तुष्टि व्यक्त गरे।
हरेक वर्ष डिसेम्बर २१ मा विश्व ध्यान दिवस मनाइँदै आएको छ। यस अवसरमा राजधानी काठमाडौंसहित देशभर विभिन्न कार्यक्रम आयोजना गरिएको थियो। कार्यक्रममा स्वामी अरुणले हाल ओशो तपोवनमा करिब ६० देशका साधकहरू ध्यानका लागि आउने गरेको जानकारी दिँदै ध्यान र योगको आवश्यकता नेपालभन्दा विकसित देशहरूमा अझ बढी रहेको बताए।
कार्यक्रममा सहभागी शिक्षा, विज्ञान तथा प्रविधिमन्त्री महावीर पुनले भ्रष्टाचार न्यूनीकरणका लागि ध्यान उपयोगी हुनसक्ने धारणा व्यक्त गरे। भ्रष्टाचारीलाई मन शुद्धीका लागि ध्यान गराउन सकिए केही हदसम्म भ्रष्टाचार कम हुन सक्ने भन्दै उनले व्यंग्यात्मक टिप्पणी गरे।
मन्त्री पुनले मन शुद्ध र शान्त बनाउन ध्यान आवश्यक रहेको उल्लेख गर्दै मन शुद्ध नभए लोभ, लालच र मोह बढ्ने तथा त्यही अवस्थाले मानिसलाई भ्रष्ट बनाउने बताए। साथै उनले सबैलाई ध्यान र योग अभ्यास गर्न आग्रह गर्दै माध्यमिक तहदेखि नै विद्यार्थीलाई ध्यान सिकाउनुपर्ने आवश्यकता औंल्याए। हप्तामा कम्तीमा एक पटक ध्यानका लागि समय छुट्याउन सकिए सकारात्मक परिवर्तन आउने उनको भनाइ थियो।
