वीरगञ्ज। वीरगञ्ज महानगरपालिका–१० स्थित पुरानो बसपार्क पछाडि रहेको त्रिशला रेस्टुराँमा कार्यरत २० वर्षीया एक युवती झुन्डिएको अवस्थामा मृत भेटिएकी छन्।
मृतक युवती पर्सागढी नगरपालिका–३, झाब्रा टोलकी सुनिता स्यान्बो भएको प्रहरीले जनाएको छ। उनी त्रिशला रेस्टुराँसँगै जोडिएको मारवाडी सेवा सङ्घद्वारा सञ्चालित धर्मशालाको कोठा नम्बर १०५ मा झुन्डिएको अवस्थामा फेला परेकी हुन्।
पर्सा प्रहरी प्रमुख प्रहरी उपरीक्षक (एसपी) सुदीप राज पाठकका अनुसार प्रारम्भिक अनुसन्धानबाट घटना आत्महत्याजस्तो देखिए पनि विस्तृत अनुसन्धान जारी रहेको छ। पोस्टमार्टम रिपोर्ट आएपछि मात्र मृत्युको कारणबारे यकिन गर्न सकिने उनले बताए।
घटनामा संलग्न हुन सक्ने आशङ्कामा प्रहरीले दुई जनालाई नियन्त्रणमा लिएको छ। अनुसन्धान प्रक्रियामा रहेको भन्दै उनीहरूको नाम हाल सार्वजनिक नगरिएको एसपी पाठकले जानकारी दिए।
हाल वडा प्रहरी कार्यालय बिर्ताका प्रमुख प्रहरी निरीक्षक विक्रम सुवेदीको नेतृत्वमा घटनास्थलमा प्रहरी टोली खटिएको छ। टोलीले मुचुल्का उठाउने कार्य गरिरहेको र मृतक युवतीका परिवारका सदस्य आएपछि शवलाई पोस्टमार्टमका लागि पठाइने तयारी भइरहेको प्रहरीले जनाएको छ।
एसपी पाठकका अनुसार प्रहरी घटनास्थलमा पुग्दा युवतीको शव झुन्डिएको अवस्थाबाट उतारेर खाटमा राखिएको थियो। प्रारम्भिक रूपमा झुन्डिएको देख्ने व्यक्तिहरूले नै शव उतारेर खाटमा राखेको पाइएको र ती व्यक्तिहरूलाई सोधपुछका लागि नियन्त्रणमा लिइएको उनले बताए।
घटनास्थलमा पुगेका वीरगञ्ज महानगरपालिका–१० का वडा सदस्य सन्तोष जैसीले पनि आफू पुग्दा शव खाटमा राखिएको अवस्थामा भेटिएको बताएका छन्। सामान्यतया जनप्रतिनिधिको उपस्थितिमा फोटो खिचेर मात्र शव उतार्ने प्रक्रिया भए पनि यस घटनामा जनप्रतिनिधि नपुग्दै शव उतारिएको उनले बताए। घटनाबारे प्रश्न उठाउँदा प्रहरीबाट दुर्व्यवहार भएको दाबीसमेत उनले गरेका छन्।
त्रिशला रेस्टुराँ स्थानीय युवा अनमोल कुमारद्वारा सञ्चालित रहेको छ। स्रोतका अनुसार रेस्टुराँ सञ्चालक अनमोल कुमारलाई पनि शङ्काको घेरामा राखेर अनुसन्धान भइरहेको छ, तर हालसम्म उनलाई पक्राउ गरिएको छैन।
घटनाको प्रकृति रहस्यमय देखिएको र प्रहरी तथा स्थानीय तहबाट आएका विवरणमा केही अस्पष्टता रहेकाले अनुसन्धानलाई अझ गम्भीरतापूर्वक अघि बढाउनुपर्ने देखिन्छ। प्रहरीले पोस्टमार्टम रिपोर्ट तथा थप प्रमाणका आधारमा घटनाको यथार्थ सार्वजनिक गर्ने अपेक्षा गरिएको छ।साभार – यात्रा डेली डटकम बाट ।
