काठमाडौँ, २०६२ असोज २४ — देशमा उत्पन्न नयाँ राजनीतिक परिस्थितिको समाधान, भ्रष्टाचार नियन्त्रण, बेथितिको अन्त्य र सुशासन स्थापनाका लागि ताजा जनादेश अपरिहार्य भएको ठहर गर्दै मधेशकेन्द्रित तीन राजनीतिक दल एकताबद्ध भएका छन्। लोकतान्त्रिक समाजवादी पार्टी नेपाल, जनता प्रगतिशील पार्टी र तराई–मधेश लोकतान्त्रिक पार्टी एकीकृत हुने निर्णयमा पुगेका हुन्।
संयुक्त प्रेस विज्ञप्तिमा तीनै दलले समान नागरिक अधिकार, राज्यका सबै संरचनामा समानुपातिक समावेशिता, विविधताको सम्मान, तथा वास्तविक राष्ट्रिय एकता निर्माण नै संघीय लोकतान्त्रिक गणतन्त्रलाई सुदृढ बनाउने आधार भएको उल्लेख गरेका छन्। सिमान्तिकरणमा पारिएका समुदायको राजनीतिक प्रतिनिधित्वका लागि एकीकृत शक्तिको निर्माण अबको अपरिहार्य आवश्यकता भएको बताइएको छ।
मधेश, थरुहट, आदिवासी जनजाति, दलित, मुस्लिम लगायत उपेक्षित समुदायलाई प्रतिनिधित्व गर्दै आएका तीन दलले ठूलो राजनीतिक स्वरूपमा अघि बढ्न अन्य समान विचारका शक्ति र व्यक्तित्वलाई समेत सहभागी हुन आग्रह गरेका छन्।
एकीकृत कार्ययोजनासहित अघि बढ्दै जाने प्रतिबद्धता व्यक्त गर्दै संयुक्त विज्ञप्तिमा लोकतान्त्रिक समाजवादी पार्टी नेपालका अध्यक्ष महन्थ ठाकुर, जनता प्रगतिशील पार्टीका अध्यक्ष हृदयेश त्रिपाठी, र तराई–मधेश लोकतान्त्रिक पार्टीका अध्यक्ष वृषेशचन्द्र लालका हस्ताक्षर छन्।
