धनुषाको मिथिला नगरपालिका–२ नक्टाझीज (हजरा चोक) मा आइतबार बिहान कारले साइकलमा सवार दम्पतीलाई ठक्कर दिँदा ५५ वर्षीय सुमित्रा देवी महतोको घटनास्थलमै मृत्यु भएको छ भने उनका श्रीमान् ६० वर्षीय राजकुमार महतो गम्भीर घाइते भएका छन् ।
प्रहरीका अनुसार बिहान करिब ७ बजेतिर जनकपुरबाट ढल्केबरतर्फ जाँदै गरेको बागमती प्रदेश ०१–०३१ च २०३६ नम्बरको कारले साइकलमा आउँदै गरेका दम्पतीलाई ठक्कर दिएको हो । दुर्घटनामा सुमित्रा देवीको घटनास्थलमै ज्यान गएको थियो भने राजकुमार महतोलाई गम्भीर चोट लागेको छ ।
घाइते राजकुमारको अहिले प्रादेशिक अस्पताल जनकपुरमा उपचार भइरहेको छ । मृतक सुमित्रा देवी र घाइते राजकुमार दुवै मिथिला नगरपालिका–१ लक्ष्मी निवासका बासिन्दा हुन् ।
ठक्कर दिने कार र चालकलाई इलाका प्रहरी कार्यालय ढल्केबरको टोलीले नियन्त्रणमा लिएको छ । घटनाको थप अनुसन्धान भइरहेको जिल्ला प्रहरी कार्यालय धनुषाले जनाएको छ ।
पछिल्लो समय जनकपुर–ढल्केबर सडक खण्डमा तीव्र गतिका कारण यस्ता दुर्घटना बढ्दै गएको स्थानीयले गुनासो गरेका छन् ।
