सिरहा, मधेश प्रदेश —
सुखिपुर नगरपालिका–२ छजनामा पदमोदय फाउन्डेसनले एकै दिन तीन महत्वपूर्ण कार्यक्रम आयोजना गर्ने भएको छ। सामाजिक सेवा र युवा सशक्तीकरणमा सक्रिय यस संस्थाले आगामी मिति २०८२ कार्तिक २६ गते बुधवार बिहान ९ बजेदेखि १२ बजे सम्म श्री रामजानकी प्राविधिक विद्यालय, छजना–२, सुखिपुरमा कार्यक्रम सञ्चालन गर्ने जनाएको छ।
फाउन्डेसनका अध्यक्ष दिपेन्द्र महतोका अनुसार उक्त दिन पदमोदय क्रिकेट नेट बक्सको उद्घाटन, बृक्षारोपण कार्यक्रम तथा खेलकुदमा सहयोग कार्यक्रमसहित लागुऔषध तथा दुर्व्यसन न्यूनिकरण सम्बन्धी अन्तरक्रिया पनि आयोजना हुनेछ। उनले जनताको स्वास्थ्य, खेलकुद र सामाजिक चेतनाको विकास फाउन्डेसनको प्रमुख लक्ष्य भएको बताए।
संरक्षक अशोक खड्काको विशेष सहयोगमा हुने उक्त कार्यक्रमले स्थानीय युवामा सकारात्मक सोच र सामाजिक उत्तरदायित्वको भावना विकास गर्न सहयोग पुर्याउने अध्यक्ष महतोको भनाइ छ। कार्यक्रमका क्रममा विद्यालयका विद्यार्थी, अभिभावक, स्थानीय समाजसेवी र सरोकारवाला निकायका प्रतिनिधिहरूको समेत सहभागिता रहने फाउन्डेसनले जनाएको छ।
विगत दुई वर्षदेखि पदमोदय फाउन्डेसनले विपन्न वर्गका परिवारहरूलाई स्वास्थ्य, शिक्षा र रोजगारका अवसरहरूमा विशेष ध्यान दिँदै विभिन्न सहयोगमूलक कार्यक्रम सञ्चालन गर्दै आएको छ। संस्थाले स्थानीय युवालाई सीपमूलक तालीम, विद्यालयका विद्यार्थीलाई शैक्षिक सामग्री वितरण, तथा आर्थिक रूपमा कमजोर परिवारका बिरामीहरूलाई औषधि र उपचार सहयोग प्रदान गर्दै आएको छ।
फाउन्डेसनले “हाम्रो हात सधैं तपाईंको साथ” भन्ने मूल नारालाई व्यवहारिक रूपमा उतार्दै समुदायमा आशा, सहयोग र सशक्तीकरणको सन्देश फैलाउने अभियान निरन्तर अघि बढाइरहेको छ।
