रिपोर्ट — अनिल सिंह, सिरहा (सुखिपुर)
सुखिपुर नगरपालिका–८ महदेवा स्थित एक करोडभन्दा बढी लागतमा निर्माण गरिएको बृद्धाआश्रम विगत केही वर्षदेखि अनिश्चितकालीन रूपमा प्रयोगविहीन रहेको तथ्य स्थानीय समाजसेवीहरूले सार्वजनिक गरेका छन्।
स्थानीयवासीहरूका अनुसार, बृद्धाआश्रम निर्माण त भयो, तर आजसम्म यसको प्रयोग सुरु गर्न सकिएको छैन। स्थानीयले प्रश्न गरेका छन् — “कुन उद्देश्यका लागि जनताको करबाट यस्तो संरचना बनाइयो ? प्रयोगमा किन नल्याइयो ?”
एक स्थानीय समाजसेवीले भने, “हाम्रो समाजमा आमा–बुबालाई बृद्धाआश्रम पठाउने संस्कार नै छैन। यस्तो अवस्थामा सरकारले जनताको खुन–पसिनाको कमाईबाट यस्तो योजना किन ल्यायो भन्ने कुरा सरकारकै बुझाइमा होला।”
उनीहरूका अनुसार, बृद्धाआश्रम निर्माणमा नै नीतिगत भ्रष्टाचार भएको छ। निर्माणपछि पनि प्रयोगमा नआउनु नै त्यसको प्रमाण हो।
यसबीच, स्थानीय समाजसेवीहरूको पहलमा श्री जानकी अवध धर्मशाला निर्माण गरिएको छ। दीपेन्द्र सिंहको अध्यक्षतामा १३ सदस्यीय श्री जानकी अवध धर्मशाला समिति गठन गरिएको हो।
सिंहले भने, “धर्मशालाको निर्माणमा सरकारले कुनै लगानी गरेको छैन, यो समाजसेवीहरूको सामूहिक श्रम र सहयोगबाट बनेको हो।”
स्थानीय राजकुमार चौधरीका अनुसार, यही मिति २०८२ साल कार्तिक १९ र २० गते श्री जानकी अवध धर्मशालाको प्रांगणमा “समा–चकेवा महोत्सव २०८२” आयोजना गरिने भएको छ।
चौधरीले भने, “यो महोत्सव मधेशी, स्वदेशी र देशभक्त नेपालीहरूको संस्कृति, सभ्यता र पहिचानको प्रतीकका रूपमा मनाइनेछ।”
📸 फोटो क्याप्शन:
सुखिपुर–८ महदेवामा निर्माण सम्पन्न भए पनि वर्षौंदेखि प्रयोगविहीन रहेको बृद्धाआश्रमको भवन।
🕘 प्रकाशित मिति: २०८२ कार्तिक ७
