राजविराज – सप्तरीको हनुमाननगर कंकालिनी नगरपालिका–२, सकरदहीमा आफ्नै सासूले करकापमा पारी १७ हप्ताकी गर्भवती बुहारीको जबर्जस्ती गर्भपतन गराएको अमानवीय घटना सार्वजनिक भएको छ।
पीडित सनिसा खंगका अनुसार, सासू चुलबुलदेवी खंग र काकीसासू सीता खंगले मंगलबार राति जबर्जस्ती बच्चा खसाउने औषधि खुवाएका थिए। ‘म सुतिरहेको बेलामा काकीसासूले मेरो छातीमा चढेर हात च्यापिन्। म चिच्याउन सकिन। त्यसकै फाइदा उठाएर सासूले मुखमा औषधि कोच्याईन।’ सनिसाले भनिन्–‘कुन औषधि थियो, मलाई थाहा भएन तर बच्चा खसाउने औषधि नै थियो।’
औषधि खाएपछि पेटमा असह्य पीडा भएपछि आफुले भाग्न प्रयास गर्दा पनि नसकेको उनको भनाई छ। रातको समयमा स्थानीयको सहयोगमा उनलाई प्रहरीसमक्ष पुर्याइएको थियो।
प्रहरीले तत्कार्ल सनिसालाई उद्धार गरेर राति करिब ४ बजे गजेन्द्रनारायण सिंह अस्पताल, राजविराज पुर्याएको थियो। अस्पताल पुर्याउँदा उनको स्वास्थ्य अवस्था गम्भीर भइसकेको थियो।
अस्पतालका मेसु डा. प्रकाशप्रसाद साहका अनुसार, सनिसा अस्पताल पुग्दा तीव्र पेट दुखाइ, रक्तस्राव र मानसिक आघातको अवस्थामा थिइन्। बिहान ८ बजे उनको गर्भपतन भएको पुष्टि गरिएको छ। उनको गर्भावस्थाको अवधि १७ हप्ताको थियो।
घटनापछि सासू चुलबुलदेवी खंग र ससुरा परमेश्वर खंगलाई प्रहरीले नियन्त्रणमा लिई अनुसन्धान सुरु गरिसकेको छ। काकीसासू सीता खंगसमेत अनुसन्धानको दायरामा छिन्। जिल्ला प्रहरी कार्यालय सप्तरीका एसपी ढकेन्द्र खतिवडाले दोषीउपर कडा कारबाही गरिने बताएका छन्।
‘घटना अत्यन्तै जघन्य छ। कानुनी रूपमा यस्ता अपराधीलाई उन्मुक्ति दिइने छैन’, उनले भने।
