बितेको मंगलबार दिउँसो इलाका प्रहरी कार्यालय गोलबजारका प्रहरी निरीक्षक गोविन्द साहको मोवाइलमा घण्टी बज्छ । फोन उठेपछि उनलाई एउटा सुराक दिइन्छ – ‘ फलानो नं. को मोटरवाइकको सिट मुनि ब्राउन सुगरको प्याकेट छ र त्यो बाइक फलानो एरियामा छ ’ । सूचनाका आधारमा प्रहरीले गोलबजार वडा नं. ६ को पान पसल अगाडि पर्किङ्ग गरिराखिएको बाइक नियन्त्रणमा लिएर खानतलासी गर्दा सुराकीले दिएको सूचना सही ठहर्छ । बाइकको सिट मुनि ब्राउन सुगर भेटिन्छ । प्रहरीले बाइक र बाइक धनी गोलबजार नगरपालिका ६ बस्ने जग्गा खरिदबिक्री गर्ने व्यवसायी श्याम साहलाई तत्कालै नियन्त्रणमा लिन्छ ।
आफुले गर्दै नगरेको अपराध कसरी भयो , सिट मुनि कसरी ब्राउन सुगर आयो भनेर पक्राउ परेका साह छक्क पर्छन् । उनले आफु विरुद्ध कुनै षडयन्त्र भएको प्रहरीलाई बताएपछि प्रहरीले थप अनुसन्धान थाल्यो । मोटरबाइक पार्किङ्ग गरिएको एक पसलको सिसिटिभी फुटेज चेकजाँच गर्दा एक व्यक्तिले श्याम साह चढ्ने बाइकको सिट मुनि केही घुसारेको देखिन्छ । फुटेजमा ती व्यक्तिले बाइकको सिट मुनि कुनै वस्तु घुसारेर तत्कालै कसैलाई फोन गरेको देखिन्छ ।
जिल्ला प्रहरी कार्यालय सिरहाका प्रहरी नायव उपरीक्षक तथा प्रवक्ता वीरेन्द्र पासवानले भने, कसैले योजनावद्ध रुपमा लागु पदार्थ केसमा श्याम साहलाई फसाउन खोजेको प्राराम्भिक अनुसन्धानबाट देखिएको छ । थप अनुसन्धान हुँदैछ । निर्दोष फस्दैन , दोषी बच्दैन । उनले भने सिसिटिभी फुटेजमा देखिएका व्यक्ति पहिचान भएको र उसको खोजी भइरहेको छ ।
पक्राउ परेका साह थुनामुक्त भएका छैनन् । यो घटनाले गोलबजारमा व्यापारीहरु स्तब्ध भएका छन् । उद्योग व्यपार संघका गोलबजारका अध्यक्षले भने षडयन्त्र रच्नेहरु जो भएपनि ठीक काम गरेनन् । प्रहरीले निर्दोषलाई थुनामुक्त गर्ने आशा गरेको उनले बताए ।
