जनकपुरधाम । धनुषाका पत्रकार स्वर्गीय विनय कुमार यादवको घटनामा सँलग्न आरोपमा फरार रहेका यादव परिवार ८ महिनापछि पक्राउ परेका छन् ।
गत बैशाख ११ गते बिहान करिब ४ बजेको समयमा ढल्केवर–जनकपुर ६ लेन सडकमा पत्रकार बिनय कुमार यादवको शंकास्पद मृत्यू भएको थियो । घटना हुनु अगाडी विभिन्न तबरबाट पाएको धाकधम्की प्रमाणको आधारमा धनुषाधाम नगरपालिका वडा नं. ५ नौसयबिघा बस्ने स्थानीय सुशिल यादव, उनका छोराद्धय बीरेन्द्र यादव र धीरेन्द्र यादवमाथि किटानी जाहेरी परेपछि फरार रहेका थिए ।
जाहेरी परेपछि भगौडामा रहेका तीनै बाबुछोरा हाजिरी हुनको लागि धनुषा जिल्ला अदालत आएपछि प्रहरीले उनीहरुलाई पक्राउ गरेको हो । यद्यपी, फरार रहेका उनीहरुलाई धनुषा प्रहरीले लोकेशन थाहा हुँदाहुँदै पक्राउ गर्ने मनसाय भने बनाएका थिएनन् । उनीहरुमाथि कर्तव्य ज्यानको मुद्दा धनुषा जिल्ला अदालतमा चलिरहेको छ ।
घटना भएदेखि नै उनीहरु गाउँबाट भागेका थिए । भागेर सिरहाका नरहा गाउँपालिका वडा नम्बर २ स्थित आफन्तको घरमा बस्दै आएको बताइएको छ । केही जना भारत बिहारमा आफन्त कहाँ बस्दै आएको जानकारी परिवारजनले दिएको हो । उनीहरु अदालतमा हाजिर हुन आएपछि पक्राउ परेका हुन् । अहिले जिल्ला प्रहरी कार्यालय धनुषामा राखेर अनुसन्धान प्रक्रिया अगाडी बढाएको हो ।
पत्रकार यादव सवार मोटरसाईकल चलाउने सोही ठाउँका ललन भन्ने लक्ष्मीनारायण यादवलाई हाजिरी जमानीमा राखेर अनुसन्धान गरिरहेको छ । धनुषा प्रहरीले सरकारी वकिलको कार्यालयमा बुझाएको प्रतिवेदन अनुसार सरकारी वकिलको कार्यालयले यादवलाई हाजिरी जमानीमा रिहा गरेको हो । यादवलाई छुटाउनको लागि धनुषाधाम क्षेत्रका माओवादीका एक नेताले भूमिका खेलेका थिए ।
पत्रकार यादवको शवको प्रकृति हेर्दा उनलाई हत्या गरी फालेको आशंका गरिएको छ । यद्यपी प्रहरीले भने सवारी दुर्घटनामा ज्यान गएको दाबी गर्दै आएको छ ।
