जनकपुरधाम । श्रीमान बाहेक अन्य पुरुषसँगको अवैद्य सम्बन्धको कारण एक महिलाको हत्या भएको खुलेको छ ।
महोत्तरी जिल्लाको पिपरा गाउँपालिकामा हत्या गरिएको एक जना महिलाको शव प्रहरीले सोमवार बरामद गरेको हो । पिपरा गाउँपालिकाको वडा नम्बर ७ स्थित दनौलीको चौरीमा रहेको अशोक ठाकुरको आँप बगैंचामा अनुहार जलेको अवस्थामा प्रहरीले महिलाको शव बरामद गरेको छ ।
महोत्तरीका प्रहरी उपरीक्षक नकुल पोखरेलले जनाए अनुसार महिला विवाहित रहेको र कम्तीमा एकजना सन्तान भएको हुनुपर्ने प्राथमिक अनुसन्धानमा देखिएको छ । मृतक महिलाको पहिचान खुल्न नसकेको बताउँदै उनले २५–३० वर्ष उमेर रहेको अनुमान गरिएको उनले बताए । खेतबारी तर्फ गएका स्थानीय वासिन्दाहरुले आँपको बगैँचामा शव हेरेपछि प्रहरीलाई जानकारी गराइएको थियो ।
विहान करिब साढे ८ बजे सुचना प्राप्त भए लगतै घटनास्थलमा प्रहरी पुगेको प्रहरी उपरीक्षक पोखरेलले बताए । ‘महिलाको सलले घाँटी थिचेर हत्या गरिएको देखिन्छ’ उनले भने, ‘त्यही सल अनुहारमा राखेर जलाइएकोले केही भाग जलेको हो ।’ महिलाले हल्का पहेलो रंगको कुर्ता लगाएकी छन् । प्रारम्भिक अनुसन्धानमा महिलाको हत्या गरिएको स्थान भन्दा केही पर घिसारेर लगिएको देखिन्छ । त्यसपछि महिलाको अनुहारमा सल राखेर आगो लगाइएको छ ।
घटनास्थलको प्रकृति अनुसार महिला र हत्यामा संलग्न व्यक्ति सहमतिमै आँपको बगैँचासम्म पुगेको देखिन्छ । शव फेला परेको स्थल भन्दा केही पर उनीहरुले सहमतिमै केही समय बिताएको हुन सक्ने अनुमान गरिएको छ । तर पछि केही विषयमा असहमति भएर हत्या गरेको हुन सक्ने आशंका गरिएको छ । महिलालाई पहिले देखि नै हत्या गर्ने उदेश्यले ललाइफकाइ त्यहाँ सम्म लगेको हुन सक्ने अनुमान पनि छ । घटनास्थलमा पुगेका चिकित्सकको अनुमान अनुसार मध्यराति पछि हत्या भएको हुन सक्छ ।
घटनास्थल सम्म हत्यारा र महिला मोटरसाइकलमा पुगेको अनुमान छ । मृतकको पहिचान लुकाउन अनुहार जलाएका अपराधीले महिलाको पर्स, मोबाइल लगायतका सरसामानहरु समेत सँगै लगेको हुन सक्ने प्रहरीको अनुमान छ । महिलाको हत्याको कारण अवैध सम्बन्ध रहेको देखिन्छ ।
पतिले हत्या गर्ने उदेश्यले महिलालाई राति सुनसान स्थलमा लगेर सम्बन्ध बनाउने जस्तो कार्य गर्न नसक्ने र महिला पनि पतिसित राति सुनसान बगैँचामा जान तयार हुने अनुमान गर्न कठिन भएको तर्क पनि अनुसन्धानमा संलग्न प्रहरीहरुको तर्क छ । प्रहरीको अनुसन्धान महिलाको परिवार तर्फ पनि सोझिएको छ । महिलाको चरित्रमाथि आशंका गरेर पतिपनि हत्यामा संलग्न हुन सक्ने प्रहरीको आशंका छ ।एसपी पोखरेलले बिभिन्न कोणहरुबाट अनुसन्धान थालिएको बताएका छन् ।
अनुसन्धानमा प्रहरी उपरीक्षक पोखरेलको टोली, प्रदेश प्रहरी कार्यालयबाट तालिम प्राप्त कुकुरको टोली, प्रादेशिक अस्पताल जलेश्वरबाट चिकित्सकसमेत बोलाएर प्रहरीले पाँच घण्टा भन्दा बढी घटनास्थलको अनुसन्धान गरेको थियो । प्रहरी उपरीक्षक पोखरेलले अनुसन्धानलाई सहज बनाउन महिलाको पहिचान खुल्न आवश्यक भएको बताए । ‘महिलाको पहिचान नखुले सम्म अनुसन्धानलाई बिभिन्न कोणबाट अगाडि बढाइएको छ ’उनले भने, प्रहरी चाँडै अपराधिसम्म पुग्ने छ ।
घटनास्थलको मुचुल्का गरी शव पोस्टमार्टमका लागि प्रादेशिक अस्पताल जनकपुरधाममा राखिएको र घटनाका विषयमा थप अनुसन्धान गरिरहेको प्रहरी नायब उपरीक्षक सन्तुलाल जयसवारले बताए । अनुसन्धान अपराधिको नजिक सम्म पुगेको र चाँडै खुलासा हुने प्रहरीको दाबी छ । अनुसन्धानमा संलग्न प्रहरी अधिकारीहरुका अनुसार अवैध सम्बन्धकै कारण महिलाको हत्या भएको निश्चित प्रायः छ । घटनास्थल रहेको गाउँ टोलमा कोही महिला हराइरहेको जानकारी प्राप्त हुन नसकेको प्रहरी नायब उपरीक्षक जयसवारले बताए ।
