सिरहा, गोलबजार — सिरहाको गोलबजारस्थित एभी मल (AB Mall) ले अब सर्वसाधारण व्यवसायीका लागि सटर भाडामा उपलब्ध गराउने भएको छ। सिरहा सुपरमार्केट प्रालिद्वारा २०७६ असोजदेखि एकल रूपमा सञ्चालन हुँदै आएको उक्त मलले बदलिँदो आर्थिक परिवेशलाई मध्यनजर गर्दै सहकार्यको ढोका खुला गरेको हो।
मल व्यवस्थापनका अनुसार पछिल्ला केही वर्षयता कोभिड–१९ महामारी र देशव्यापी आर्थिक मन्दीका कारण व्यापारमा उल्लेखनीय गिरावट आएको छ। यसको प्रभाव सिरहाको प्रमुख व्यापारिक केन्द्र मानिने एभी मलमा पनि परेको देखिन्छ।
मलका संस्थापक फैसल अन्सारीले जिल्लाकै पहिचानका रूपमा रहेको यस मललाई पुनः सशक्त र व्यवस्थित बनाउने लक्ष्यसहित अन्य व्यवसायीलाई पनि सहकार्यका लागि आव्हान गरिएको बताए। “हामी आफैं पनि ठूलो व्यवसायी होइनौं, लामो अनुभव पनि छैन। तर यो मल जिल्लाकै शान हो। यसलाई पुरानै लयमा फर्काउन सबै मिलेर काम गर्न आवश्यक छ,” उनले भने।
उनले थपे, सामूहिक प्रयासबाट मललाई अझ आकर्षक र व्यवसायमैत्री बनाउँदै ग्राहकको विश्वास पुनः जित्न सकिने विश्वास लिइएको छ।
व्यवसाय सञ्चालन गर्न इच्छुक व्यवसायीहरूले सटर भाडामा लिएर आफ्ना व्यवसाय विस्तार गर्न सक्नेछन्। थप जानकारीका लागि इच्छुक व्यक्तिहरूले ९८२७७७१०७७ मा सम्पर्क गर्न सक्नेछन्।
