जनकपुरधाम । आर्थिक अभावका कारण उपचार गराउन नसकेर मृत्यूवरण गरेका शास्त्रीय संगीत गुरु गुरुदेव कामतलाई पारिश्रमिक नदिएको आरोप लागेपछि मधेश प्रज्ञा प्रतिष्ठानका अध्यक्ष रामभरोस कापड़ी ‘भ्रमर’ विवादमा तानिएका छन् ।
मधेशका शिक्षा तथा संस्कृति मन्त्रालयले स्वर्गीय कामतलाई काम गराई ज्याला नदिएको आरोप सम्बन्धमा के कसो भएको हो ? भन्दै प्रतिष्ठानसँग लिखित जवाफ माग गरेको हो ।
प्रतिष्ठानको क्यालेण्डरमा पनि स्व. कामतले गरेको प्रस्तुतिको फोटो र भिडियो समेत देखिएको छ । उक्त कार्यक्रमसंग सम्बन्धित सम्पूर्ण कागजात साउन २२ गतेभित्र मन्त्रालयमा पेश गर्न मन्त्रीय स्तरीय निर्णयानुसार अनुरोध छ– प्रतिष्ठानलाई पठाएको पत्रमा उल्लेख छ ।
बिहीबार सिरहाको पोखरभिन्डास्थित आफ्नै घरमा ६९ वर्षीय स्रष्टा कामतको निधन भएको छ । निधन भएको दुई दिन अगाडी उनले प्रतिष्ठानका अध्यक्ष कापडीले काम गराए वापतको १ लाख ज्याला पनि नदिएको गुनासो गरेका थिए ।
उनले गरेको गुनासोको भिडियो अहिले सामाजिक संजालमा भाइरल छ । यो भिडिओ पोस्ट गर्दै धेरैले प्रतिष्ठानका अध्यक्ष कापड़ीको राजीनामा समेत माग गरेका छन् ।
