महालेखा परीक्षकको प्रतिवेदनले औंल्याए अनुसार गोलबजार नगरपालिकामा आर्थिक वर्ष २०७९÷०८० मा ७९ लाख ७६ हजार ७४४ खर्च गरिएको छ । यो खर्च विविध शीर्षकमा देखाइएको छ । यो खर्च नगरपालिकाको आन्तरिक श्रोतबाट खर्च गरिन्छ । गत आर्थिक वर्षमा आन्तरिक राजस्व ४ करोड ९५ लाख १३ हजार २१४ उठेकोमा त्यसको १६ प्रतिशत रकम चिया र पानीमा उडाइएको छ ।
महालेखा परीक्षकको प्रतिवेदनमा भनिएको छ खर्च पुष्टि गर्ने विल भपाई र त्यसको आधार समेत नराखी मनपरी ढंगबाट चिया , खाजा र पानीको विल भुक्तानी गरिएको छ । कुन कार्यमा के प्रयोजनका लागि चियापान गरिएको हो भन्ने निर्णय र पुष्टि हुने प्रमाण नै नराखी अन्धाधुन्ध भुक्रानी लिएको लेखापरीक्षण प्रतिवेदन मै उल्लेख छ । विविध खर्चको उद्देश्य र खर्चको यथार्थता पुष्टि हुने आधार नराखी लिइएको भुक्तानीमा अनियमिमताको गन्ध आएको छ ।
सुत्रहरुले बताए अनुसार मेयर तथा प्रमुख प्रशासकीय अधिकृतको आमोद प्रमोद तथा विलासिता खर्च , अघोषित सुरक्षा दस्ताको मान्स मदिरा खर्च समेत यसै विविध खर्चबाट बेहोरिने हुनाले ८० लाख पुग्न गएको हो । एमाले नेता सोनेलाल तामाङ्ग भन्छन् जनताले रगत पसिना बगाएर तिरेको करबाट विविध खर्च अन्तर्गत एक वर्षमा ८० लाखको हाराहारीमा चिया , खाजा र पानीमा उडाएर जनप्रतिनिधि तथा कर्मचारीहरु उघ्राएर बसेका छन् । तर जनताले खानेपानीको हाहाकार भोगिरहेका छन् ।
