सर्लाही, असार ७ — सर्लाहीको बसबरिया गाउँपालिका–२ मानपुर टोलमा एक पुरुषको धारिलो हतियार प्रहार गरी हत्या गरिएको छ।
स्थानीय ५० वर्षीय होसनारायण यादवको शनिबार राति आफ्नै घरमा सुतिरहेको अवस्थामा हत्या भएको प्रहरीले जनाएको छ। प्रारम्भिक अनुसन्धान अनुसार दुई जना अपरिचित व्यक्ति घरभित्र प्रवेश गरी उनको घाँटीमा धारिलो हतियार प्रहार गरेका थिए।
जिल्ला प्रहरी कार्यालय सर्लाहीका प्रवक्ता एवं डीएसपी वेदप्रसाद गौतमका अनुसार घटनाबारे सूचना प्राप्त हुनासाथ प्रहरी टोली घटनास्थल पुगेको थियो।
घटनाको अनुसन्धानका लागि सर्लाही प्रहरी प्रमुख एसपी रवीन्द्रनाथ पौडेल तथा बरहथवाका डीएसपी गोपीकृष्ण सुवेदीसहितको टोली परिचालन गरिएको छ। अनुसन्धानलाई प्रभावकारी बनाउन प्रहरीले तालिमप्राप्त कुकुरसमेत प्रयोग गरेको छ।
गम्भीर घाइते भएका होसनारायणलाई उपचारका लागि बरहथवा लगिएको भए पनि चिकित्सकले मृत घोषणा गरेका थिए। उनको शव पोस्टमार्टमका लागि आइतबार बिहान मलङ्गवास्थित प्रादेशिक अस्पताल पठाइएको प्रहरीले जनाएको छ।
