लखनऊको भीषण आगलागीमा १५ जनाको मृत्यु, अधिकांशको ज्यान धुवाँका कारण गयो
काठमाडौं । भारतको उत्तर प्रदेशको लखनऊस्थित अलिगञ्ज क्षेत्रमा भएको भीषण आगलागीमा कम्तीमा १५ जनाको मृत्यु भएको छ। प्रारम्भिक स्वास्थ्य परीक्षणले अधिकांशको मृत्यु प्रत्यक्ष आगोका कारण नभई अत्यधिक धुवाँका कारण श्वासप्रश्वासमा समस्या उत्पन्न भएर भएको देखाएको छ।
सोमबार एक भवनमा आगलागी भएको थियो। उक्त भवनमा पुस्तकालय (लाइब्रेरी) तथा कम्प्युटर प्रशिक्षण केन्द्र सञ्चालनमा रहेको बताइएको छ। आगलागीपछि घाइते तथा प्रभावित व्यक्तिहरूलाई विभिन्न अस्पतालमा उपचारका लागि भर्ना गरिएको छ।
किङ जर्ज मेडिकल युनिभर्सिटीका मेडिकल सुपरिन्टेन्डेन्ट डा. प्रेम राज सिंहका अनुसार अस्पताल ल्याइएका १५ जनाको घटनास्थलमै वा अस्पताल ल्याइँदासम्म मृत्यु भइसकेको थियो। उनका अनुसार अधिकांश मृतकमा विषाक्त धुवाँको असरका कारण श्वासप्रश्वास प्रणाली गम्भीर रूपमा प्रभावित भएको पाइएको छ।
घटनामा घाइते भएका सातदेखि आठ जनाको विभिन्न अस्पतालमा उपचार भइरहेको छ। केही घाइतेलाई सामान्य चोटपटक लागेको छ भने एक जनाको ढाडमा गम्भीर चोट देखिएको चिकित्सकहरूले बताएका छन्।
स्वास्थ्य विज्ञहरूका अनुसार आगलागीका घटनामा प्रत्यक्ष आगोभन्दा पनि विषाक्त धुवाँ र अक्सिजनको कमी ज्यानका लागि बढी घातक हुने गर्छ। विशेषगरी बन्द कोठा वा भवनभित्र आगलागी हुँदा निस्कने कार्बन मोनोअक्साइड, साइनाइडलगायतका विषाक्त ग्यासले केही मिनेटमै मानिसलाई बेहोस बनाउन सक्ने र मृत्युको जोखिम बढाउने गर्छ।
प्रत्यक्षदर्शीहरूका अनुसार आगलागीपछि भवनभित्र अफरातफरी मच्चिएको थियो। ज्यान बचाउने प्रयासमा एक व्यक्तिले भवनबाट हाम फालेका थिए, जसका कारण उनी गम्भीर घाइते भएका छन्।
घटनाप्रति दुःख व्यक्त गर्दै भारतका प्रधानमन्त्री नरेन्द्र मोदीले मृतकका परिवारलाई आर्थिक राहत उपलब्ध गराउने घोषणा गरेका छन्। प्रधानमन्त्री राहत कोषबाट मृतकका परिवारलाई जनही दुई लाख भारतीय रुपैयाँ तथा घाइतेलाई ५० हजार भारतीय रुपैयाँ प्रदान गरिने जनाइएको छ।
उत्तर प्रदेशका मुख्यमन्त्री योगी आदित्यनाथले घटनाको विस्तृत छानबिन गरिने र दोषीमाथि कडा कारबाही गरिने बताएका छन्। उनले घटनास्थलको निरीक्षण गर्दै उद्धार तथा उपचार कार्यलाई तीव्र बनाउन सम्बन्धित निकायलाई निर्देशनसमेत दिएका छन्।
स्वास्थ्यकर्मीहरूका अनुसार आगलागीपछि धुवाँजन्य श्वासप्रश्वास समस्या, शरीरमा अक्सिजनको कमी, जलन तथा मानसिक आघात प्रमुख स्वास्थ्य चुनौतीका रूपमा देखिने भएकाले यस्ता दुर्घटनामा तत्काल उद्धार, अक्सिजन उपचार र आपत्कालीन स्वास्थ्य सेवा अत्यन्त महत्वपूर्ण हुने गर्छ।
