रौतहटको बौधीमाई नगरपालिका–६ स्थित बलवान इँटा उद्योग नजिक रहेको पानी भरिएको खाडलमा डुबेर एक बालकको ज्यान गएको छ।
जिल्ला प्रहरी कार्यालय रौतहटका प्रवक्ता डीएसपी बसन्त गौतमका अनुसार सोमबार दिउँसो करिब १२ः४५ बजे स्थानीय दीपेन्द्र राय यादवका १० वर्षीय छोरा सुप्रित यादव खाडलमा डुबेको अवस्थामा मृत फेला परेका हुन्।
घटनाको जानकारी प्राप्त हुनासाथ इलाका प्रहरी कार्यालय कोपवा पिपरियाबाट प्रहरी टोली घटनास्थलमा पुगेर आवश्यक सुरक्षा व्यवस्था मिलाउनुका साथै प्रारम्भिक अनुसन्धान थालेको थियो। घटनास्थल प्रहरी कार्यालयबाट करिब तीन किलोमिटर पश्चिमतर्फ रहेको बताइएको छ।
त्यसपछि जिल्ला प्रहरी कार्यालय रौतहटबाट इन्स्पेक्टर विश्वनाथ यादवको नेतृत्वमा अनुसन्धान टोली घटनास्थल पुगेको थियो। प्रहरीले घटनास्थलको मुचुल्का उठाउने तथा घटनाको विस्तृत अनुसन्धान गर्ने कार्य गरिरहेको जनाएको छ। शवलाई पोस्टमार्टमका लागि प्रादेशिक अस्पताल गौर पठाइएको छ।
प्रहरीका अनुसार बालक खाडलसम्म कसरी पुगे र डुबेर मृत्यु हुन पुगे भन्ने विषयमा थप अनुसन्धान भइरहेको छ।
स्थानीयवासीका अनुसार इँटाभट्टाका लागि माटो उत्खनन गर्दा बनाइएका खाडलहरू काम सम्पन्न भएपछि नपुरिने भएकाले वर्षायाममा पानी जम्ने गरेको छ। यस्ता खुला तथा असुरक्षित खाडलहरूले विशेषगरी बालबालिकाको सुरक्षामा गम्भीर जोखिम निम्त्याइरहेका छन्। विगतका वर्षहरूमा पनि यस्तै खाडलमा डुबेर हुने दुर्घटनाका घटनाहरू दोहोरिँदै आएका छन्।
स्थानीयहरूले यस्ता जोखिमपूर्ण खाडलहरू तत्काल पुर्न वा आवश्यक सुरक्षा उपाय अपनाउन सम्बन्धित निकाय तथा इँटाभट्टा सञ्चालकहरूको ध्यानाकर्षण गराएका छन्।
