जनमत पार्टीले मधेश प्रदेश सरकारबाट समर्थन फिर्ता लिएको घोषणा गरे पनि सोही पार्टीका संसदीय दलका नेता तथा अर्थमन्त्री महेश प्रसाद यादव ले भने समर्थन कायमै रहेको बताएका छन्।
जनमत पार्टीले कृष्णा यादव नेतृत्वको सरकारलाई दिएको समर्थन सोमबार फिर्ता लिएको जानकारी गराए पनि नेता यादवले त्यसप्रति असहमति जनाएका हुन्। उनले प्रदेश प्रमुखलाई पत्र लेख्दै आफ्नो जानकारीबिनै र कुनै औपचारिक बैठक नै नगरी समर्थन फिर्ता लिएको निर्णय सार्वजनिक गरिएको दाबी गरेका छन्।
यादवले आफू पार्टीको संसदीय दलको नेता भएको उल्लेख गर्दै वर्तमान सरकारप्रति जनमत पार्टीको समर्थन अझै कायम रहेको स्पष्ट पारेका छन्। उता, पार्टी अध्यक्ष डॉ. सीके राउत को आधिकारिक सचिवालयमार्फत भने समर्थन फिर्ता लिइएको घोषणा गरिएको थियो।
