सिरहाको गोलबजार नगरपालिका–४ निवासी डा. रुपेश सिंहले चिकित्सा क्षेत्रमा हासिल गरेको उल्लेखनीय सफलता यतिबेला आम विद्यार्थीका लागि प्रेरणा र जिल्लाबासीका लागि गर्वको विषय बनेको छ। उनको निरन्तर मेहनत, लगनशीलता र सेवाभावले उनलाई सफलताको शिखरतर्फ अग्रसर गराएको छ।
डा. सिंहले प्रारम्भिक शिक्षा गोलबजार–६ स्थित सृजना सेकेन्ड्री स्कूलबाट पूरा गरी २०६६ सालमा एसईई उत्तीर्ण गरेका थिए। त्यसपछि उनले काठमाडौंस्थित लिभरपुल कलेजबाट २०६८ सालमा विज्ञान विषयमा कक्षा १२ सम्मको अध्ययन सम्पन्न गरे। अध्ययन यात्रामा उनले कहिल्यै पछि फर्केर हेर्नुपरेन।
उच्च शिक्षा तर्फ अघि बढ्दै उनले पूर्ण छात्रवृत्तिमा चितवन मेडिकल कलेजबाट एमबीबीएस अध्ययन पूरा गरे। अध्ययनपछि भरतपुर क्यान्सर अस्पतालमा दुई वर्ष सेवा दिँदै उनले स्वास्थ्य क्षेत्रमा महत्वपूर्ण अनुभव हासिल गरे। बिरामीप्रतिको समर्पण र जिम्मेवारीका कारण उनले आफूलाई एक प्रतिबद्ध र दक्ष चिकित्सकका रूपमा स्थापित गर्न सफल भएका छन्।
हाल उनी देशकै प्रतिष्ठित स्वास्थ्य शिक्षण संस्था धरानस्थित बी.पी. कोइराला स्वास्थ्य विज्ञान प्रतिष्ठानमा एमडीजीपी अध्ययनका लागि पूर्ण छात्रवृत्ति प्राप्त गर्न सफल भएका छन्। यो उपलब्धि उनको निरन्तर प्रयास, अनुशासन र पेशाप्रतिको गहिरो समर्पणको प्रतिफल भएको उनले बताएका छन्।
उनले भने, “कुनै पनि क्षेत्रमा सफलता हासिल गर्न निरन्तर प्रयास, पेशाप्रतिको लगाव र इमान्दारी आवश्यक हुन्छ। मैले पनि आफ्नो लक्ष्यप्रति समर्पित भएर अघि बढ्दा यो सफलता प्राप्त गरेको हुँ।”
डा. सिंहले आगामी दिनमा पनि देशमै रहेर गुणस्तरीय स्वास्थ्य सेवा प्रदान गर्ने प्रतिबद्धता व्यक्त गरेका छन्।
उनको सफलताले स्थानीय बासिन्दा तथा शुभेच्छुकहरूमा खुसी र गर्वको अनुभूति गराएको छ। स्थानीय सञ्चारकर्मी तथा सहपाठी सुरेश रायका अनुसार रुपेशको सफलता उनको मेहनत, अनुशासन र पेशाप्रतिको समर्पणको परिणाम हो। उनले भने, “रुपेशको सफलताले न केवल मलाई खुशी बनाएको छ, बरु समग्र गोलबजारवासीको शिर उचो बनाएको छ।”
गोलबजार डेरी व्यवसायी सुधिर महतोका छोरा डा. रुपेश सिंहजस्ता मेहनती र लक्ष्यप्रति प्रतिबद्ध युवाको सफलता आगामी पुस्ताका लागि प्रेरणाको स्रोत बन्ने विश्वास स्थानीयले व्यक्त गरेका छन्।
