प्रवासी कुशवाहा कल्याण समाज कतारले लकवा पीडित धनुषा जिल्लाको मिथिला नगरपालिका वार्ड नम्बर ५ श्रीपुर निवासी ध्रमेन्द्र कुमार महतोलाई उपचारका लागि ४८ हजार रुपैयाँ आर्थिक सहयोग प्रदान गरेको छ।
संस्थाका अनुसार मिति २०८२ कार्तिक १० गते बुधवार आयोजित सहयोग कार्यक्रममा श्रीपुर निवासी सतरौहन यादवको पहलमा ४५२ कतारी रियाल, विनोद महतोको पहलमा ४२० कतारी रियाल र बाँकी रकम संस्थाको कोषबाट संकलन गरी पीडितलाई हस्तान्तरण गरिएको हो।
उक्त कार्यक्रममा कुशवाहा कल्याण समाज धनुषाका जिल्ला अध्यक्ष योगेन्द्र महतो, स्थानीय वडा अध्यक्ष रामचन्द्र महतो, सिरहा जिल्ला कुशवाहा समाजका कोषाध्यक्ष राजलाल महतो, समाजसेवी सरोज कुमार सिंह, अभिमन्यु सिंह, कृष्णा कुमार महतो लगायत स्थानीय बुद्धिजीवी तथा समुदायका प्रतिनिधिहरूको उल्लेखनीय उपस्थिति रहेको थियो।
सहयोग कार्यक्रम प्रवासी कुशवाहा कल्याण समाज कतारका संस्थापक कार्यकारी अध्यक्ष शिव कुमार महतोको उपस्थितिमा सम्पन्न भएको थियो भने यस अभियानमा कतारस्थित कुशवाहा कल्याण समाजका निवर्तमान अध्यक्ष कमलेश महतोको विशेष पहल रहेको जनाइएको छ।
संस्थाका अध्यक्ष घुरन महतोले विदेशमा रहेर पनि पीडित समुदायका सदस्यलाई सहयोग गर्न पाउँदा सन्तोष लागेको बताउँदै आगामी दिनमा पनि यस्ता मानवीय कार्यलाई निरन्तरता दिने प्रतिबद्धता व्यक्त गरेका छन्।
