सिरहा — सिरहा जिल्लाको नवराजपुर गाउँपालिकामा दुई समाजसेवीको सहकार्यले अपांग बालबालिकाको जीवनमा आशा र सहजता ल्याएको छ। धनगढीमाई नगरपालिकाका समाजसेवी तथा पदमोदय फाउन्डेसनका अध्यक्ष दिपेन्द्र महतो र नवराजपुर गाउँपालिकाका समाजसेवी तथा रेडक्रस सभापति नविन यादवको संयुक्त पहलमा अपांग बालबालिकालाई निःशुल्क ह्वीलचेयर वितरण गरिएको हो।
कार्यक्रमले अपांगता भएका बालबालिकाको दैनिक जीवनलाई सहज बनाउन र तिनीहरूलाई समाजमा आत्मनिर्भर बनाउने उद्देश्य लिएको थियो। ह्वीलचेयर प्राप्त गरेपछि अभिभावक र बालबालिका दुवैको अनुहारमा खुशीको मुस्कान देखिन्थ्यो। फाउन्डेसनका संरक्षक अशोक खड्काको सहयोगमा सञ्चालन भइरहेको यो अभियान निरन्तर रूपमा जारी राखिने बताइएको छ।
संरक्षक खड्काले कार्यक्रममा बोल्दै भने, “मानवीय सेवा नै सबैभन्दा ठूलो धर्म हो। समाजमा कुनै जात, धर्म वा वर्गको भेदभाव नगरी सबैले मिलेर समाज सेवा गर्नुपर्छ।” उनले पहाड–मधेशबीचको दूरी घटाउने र जातीय विभाजन अन्त्य गर्ने सन्देश पनि दिए। उनका अनुसार, यस्ता सहयोगी अभियानले समाजमा सहानुभूति र एकताको भावना बलियो बनाउँछन्।
फाउन्डेसनका अध्यक्ष दिपेन्द्र महतोले भने, “ह्वीलचेयरले बालबालिकाको जीवन सहज र स्वतन्त्र बनाउँछ। हाम्रो लक्ष्य उनीहरूलाई आत्मसम्मानका साथ बाँच्न प्रेरित गर्नु हो।” उनले आगामी दिनमा पनि यस्ता सहयोगी कार्यक्रमलाई निरन्तरता दिने प्रतिबद्धता व्यक्त गरे।
त्यसैगरी, रेडक्रस सभापति नविन यादवले अपांगता कमजोरी नभई प्रेरणाको स्रोत हो भन्दै समाजले तिनीहरूलाई समान अवसर र सम्मानका साथ स्वीकार गर्नुपर्नेमा जोड दिए।
कार्यक्रममा स्थानीय जनप्रतिनिधि, शिक्षक, युवा र अभिभावकहरूको उल्लेख्य उपस्थिति थियो। सबैले यस्तो मानवीय कार्यले समाजमा सकारात्मक सोच, एकता र सेवा भावनाको जग सुदृढ बनाएको प्रतिक्रिया दिएका थिए।
पदमोदय फाउन्डेसनले विगतदेखि नै विपन्न समुदायका परिवारहरूलाई स्वास्थ्य, शिक्षा र राहतका क्षेत्रमा सहयोग पुर्याउँदै आएको छ। यस पटकको ह्वीलचेयर वितरण कार्यक्रमले अपांग बालबालिकाका जीवनमा आशा जगाउँदै समाजमा मानवीय संवेदनशीलताको नयाँ उदाहरण प्रस्तुत गरेको छ।
