सिरहा — जिल्ला प्रहरी कार्यालय सिरहाले ठूलो परिमाणमा लागुऔषध गाँजा बरामद गरेको छ। प्रहरीका अनुसार २०८२ साल पुस १५ गते साँझ करिब ५:०० बजेको समयमा सिरहाको एक स्थानमा लुकाइछिपाई राखिएको अवस्थामा २१० किलो गाँजा बरामद गरिएको हो।
प्रहरीले विशेष सूचनाका आधारमा खोजतलास गर्ने क्रममा प्लास्टिकले पोका पारेर राखिएको गाँजा फेला पारेको जनाएको छ। बरामद गरिएको गाँजा नियन्त्रणमा लिई आवश्यक कानुनी प्रक्रिया अघि बढाइएको जिल्ला प्रहरी कार्यालय सिरहाले जारी गरेको प्रेस विज्ञप्तिमा उल्लेख छ।
घटनामा संलग्न व्यक्ति वा समूहको पहिचान तथा पक्राउका लागि थप अनुसन्धान भइरहेको प्रहरीले जनाएको छ। प्रहरीले लागुऔषध ओसारपसार तथा कारोबारविरुद्ध कडाइका साथ अभियान जारी राख्ने समेत स्पष्ट पारेको छ।
स्थानीयस्तरमा बढ्दै गएको लागुऔषध कारोबार नियन्त्रणका लागि यो सफल कारबाही महत्वपूर्ण मानिएको छ।
