राजविराज नगरपालिका–४ का मुस्लिम महिलाहरू विगत पाँच दिनदेखि टोलको सुरक्षाका लागि रातभर गस्ती गर्न थालेका छन्।
जेनजी आन्दोलनपछि टोल असुरक्षित भएको महसुस गरेपछि उनीहरूले राति १२ बजेपछि अपरिचित व्यक्तिहरू मोटरसाइकलमा आइरहने देखेपछि महिलाहरू आफैं सुरक्षा व्यवस्थापनमा खटिएका हुन्।
“हाम्रो टोलका अधिकांश पुरुषहरू वैदेशिक रोजगारीमा छन्। पुरुष नभएपछि घर र टोल जोगाउन हामी महिलाहरू नै गस्तीमा निस्किएका हौं,” स्थानीय सम्सा खातुनले भनिन्।
उनका अनुसार केही अपरिचित व्यक्ति राति ओहोरदोहोर गर्ने, टाढा पुगेर अज्ञात भाषामा कुरा गर्ने र महिलाहरू गस्तीमा देखिएपछि फर्किने गरेका छन्।
सोही टोलकी सफिना अंसारीका अनुसार बालबालिका भएका कारण थप असुरक्षा महसुस भइरहेको छ। उनले भनिन्, “घर र छोराछोरी सुरक्षित राख्न गस्तीमा निस्कनुपरेको छ। तर, ज्यान जोखिममा पर्ने डर पनि उत्तिकै छ।”
स्थानीयहरूले चोरी–लुटपाट बढेको र प्रहरीलाई जानकारी गराए पनि सुनुवाइ नभएको गुनासो गरेका छन्। अघिसम्म कहिलेकाहीँ गस्ती गर्ने प्रहरी पनि दुई सातादेखि टोलमा नदेखिएको उनीहरूको भनाइ छ।
यस विषयमा जिल्ला प्रहरी कार्यालय सप्तरीका प्रवक्ता जितेन्द्र बस्नेतले भने आफूलाई जानकारी नपुगेको बताए। उनले भने, “यो बारेमा अहिलेसम्म सूचना पाएको छैन। आवश्यक भए गस्तीका लागि प्रहरी खटाइनेछ।”
