काठमाडौं । पोखरा अन्तर्राष्ट्रिय विमानस्थल निर्माणमा भएको भ्रष्टाचारको निष्पक्ष छानबिन हुनुपर्ने माग गर्दै आइतबार पोखरामा विभिन्न क्षेत्रका कार्यकर्ताले प्रदर्शन गरेका छन् ।
नेपाल हिन्दू संघीय गणतन्त्र हुनुपर्छ भन्ने वकालत गर्ने नेपाली हिन्दू कार्यकर्ताहरुको सङ्गठन राष्ट्रिय एकता अभियानले पोखरामा उक्त प्रदर्शन गरेको हो ।
उनीहरुले भ्रष्टाचारमा संलग्न रहेको आरोप लगाउँदै नेपाल नागरिक उड्डयन प्राधिकरण (क्यान)का महानिर्देशक प्रदीप अधिकारीलाई पदबाट हटाउन पनि माग गरेका छन् ।
अभियानका अनुसार प्रदर्शनकारीले ‘पोखरा अन्तर्राष्ट्रिय विमानस्थललाई पूर्णरुपमा सञ्चालनमा ल्याउनुहोस्’, ‘विमानस्थल निर्माणमा भएको भ्रष्टाचारको छानबिन गर्नुहोस्’, ‘क्यानका भ्रष्ट डीजीलाई हटाउनुहोस्’ र ‘चिनियाँ राजदूतलाई कूटनीतिक नोट लेख्नुहोस्’ लेखिएका प्लेकार्ड बोकेर प्रदर्शन गरेका थिए ।
उनीहरुले विमानस्थल निर्माणका लागि ऋण दिने दललाई नेपाल सरकारले ऋणलाई अनुदानमा परिणत गर्न आग्रह समेत गरेका छन् ।
पोखरा अन्तर्राष्ट्रिय विमानस्थल जनवरी १, २०२३ मा धूमधामका साथ उद्घाटन गरिएको थियो। तर, त्यसयता सो विमानस्थलबाट केही मात्र अन्तर्राष्ट्रिय उडानहरू सञ्चालन भएका छन्। त्यसयता सातवटा मात्रै अन्तर्राष्ट्रिय उडान भएको सरकारी रिपाेर्टमा उल्लेख छ।
कुनै समय नेपालको सपनाको परियोजना र नेपालको सबैभन्दा पर्यटकीय सहर पोखराको फस्टाउँदै आएको अर्थतन्त्रलाई सुनिश्चित गर्ने आशाको ठूलो किरणका रूपमा हेरिएको पोखरा विमानस्थल निर्माणमा नेपालीको संलग्नता रहेको खुलासा भएपछि विवादको विषय बनेको छ । चाइना एक्जिम बैंकको सहुलियत ऋणमा विमानस्थल निर्माण भएको हो । ऋण रकम करिब रु २५ अर्ब ८८ करोड रहेको छ । ऋणलाई अनुदानमा परिणत गर्न नेपालले चीनसँग यसअघि नै अनुरोध गरिसकेको छ ।
पोखरा अन्तर्राष्ट्रिय विमानस्थल पूर्णरुपमा सञ्चालन हुन नसकेपछि चर्को ऋण लिएर बनेको विमानस्थल सेतो हात्ती बन्न सक्ने चिन्ता नेपालमा बढेको छ । न्यूयोर्क टाइम्सले पोखरा अन्तर्राष्ट्रिय विमानस्थलमा भएको भ्रष्टाचारको पर्दाफास गर्दै समाचार पनि यसअघि छापी सकेकाे छ ।
तस्वीरहरु —
