राजविराज । जनता समाजवादी पार्टी नेपाल (जसपा) का अध्यक्ष उपेन्द्र यादव ले नेपालमा राजतन्त्र पुनःस्थापना असम्भव रहेको बताएका छन् ।
राजविराजस्थित नेपाल पत्रकार महासंघ, सप्तरीमा बुधबार आयोजित पत्रकार सम्मेलनमा बोल्दै उनले देश संघीय गणतन्त्रको मार्गमा अघि बढिसकेको उल्लेख गरे । हिमालबाट पग्लिएको हिउँ पहाड र तराई हुँदै समुद्रमा मिसिएपछि पुनः हिमालतर्फ नफर्किने उदाहरण दिँदै उनले नेपाल पनि अब राजतन्त्रात्मक व्यवस्थातर्फ नफर्किने दाबी गरे । उनका अनुसार राजतन्त्र फर्काउने प्रयासहरू भए पनि ती सफल हुन नसक्ने स्पष्ट छ ।
अध्यक्ष यादवले संघीय गणतन्त्रलाई थप सुदृढ बनाउँदै प्रदेश संरचनालाई बलियो बनाउनु अहिलेको प्रमुख आवश्यकता भएको बताए । राज्यका सबै निकाय र शक्तिको संरचनामा सबै समुदायको न्यायोचित सहभागिता र समानुपातिक प्रतिनिधित्व सुनिश्चित गर्नुपर्नेमा उनले जोड दिए ।
उनले वर्तमान निर्वाचन प्रणाली परिमार्जन गरी पूर्ण समानुपातिक निर्वाचन प्रणाली अवलम्बन गर्नुपर्ने धारणा राखे । साथै, विभेदमा परेका तथा उत्पीडित समुदाय—मधेशी, आदिवासी जनजाति, महिला, थारु र पिछडिएका वर्ग—लाई न्याय सुनिश्चित गर्ने गरी संविधान संशोधन गर्नु नै वर्तमान राजनीतिक समस्याको समाधानतर्फको एक महत्वपूर्ण कदम हुन सक्ने उनले बताए ।
