नेपाली कांग्रेस परिवर्तन र विकासको भरोसायोग्य शक्ति भएको स्थानीय युवा नेता नवीन कुमार यादवले बताएका छन्। कांग्रेससँग मात्रै देशलाई सही दिशामा परिवर्तन गर्ने क्षमता रहेको दाबी गर्दै उनले विकास र निकास दुवैका लागि कांग्रेस अपरिहार्य रहेको उल्लेख गरे।
सिरहा निर्वाचन क्षेत्र नम्बर–२ मा आयोजित नेपाली कांग्रेसको चुनावी सभालाई सम्बोधन गर्दै कांग्रेस सिरहाका सभापति तथा संविधानसभा सदस्यसमेत रहेका यादवले आफू भाषणभन्दा काममा विश्वास गर्ने नेता भएको बताए। आगामी फागुन २१ गते हुने निर्वाचनका उम्मेदवारसमेत रहेका उनले विगत करिब ३० वर्षदेखि निरन्तर जनसेवामा सक्रिय रहँदै आएको स्मरण गराउँदै जनताको साथ र मतको आवश्यकता रहेको बताए।“म भाषण गरेर होइन, काम गरेर देखाउने नेता हुँ। मलाई जिताएर पठाउनुस्, विकास गरेर देखाउँछु,” उनले प्रतिबद्धता व्यक्त गरे।
सभालाई सम्बोधन गर्दै कांग्रेसका वरिष्ठ नेता रामचन्द्र यादवले लोकतन्त्र, राष्ट्रियता र संविधानको रक्षा तथा संस्थागत गर्न नेपाली कांग्रेसले नेपालको इतिहासमा निर्णायक भूमिका खेलेको बताए।कार्यक्रममा पूर्व जिल्ला सभापति तथा सांसद अमय कुमार यादव, पूर्व सांसद नरेश कुमार यादव, मधेस प्रदेश सभा सदस्य जिबछी यादव, कांग्रेस मधेस प्रदेश सदस्य सरोज कुमार यादव, नेता सुमन यादव, वरियारपट्टी गाउँपालिका उपाध्यक्ष ममता कुमारी यादव, नेता शैलेन्द्र यादव, उपेन्द्र यादव, रामपृत यादव, मदन यादवलगायत जिल्लाका वरिष्ठ नेता तथा कार्यकर्ताको उल्लेखनीय उपस्थिति रहेको थियो।
जसपा नेपालको प्रभाव क्षेत्र मानिने वरियारपट्टीमा कांग्रेसको ठूलो उपस्थितिले पार्टीप्रति जनआकर्षण बढ्दै गएको आयोजकले दाबी गरेका छन्। चुनाव नजिकिँदै जाँदा कांग्रेस उम्मेदवार यादवप्रति जनसमर्थन र उत्साह तीव्र बन्दै गएको जनाइएको छ।सभामा हजारौँको सहभागिता रहेको र विभिन्न राजनीतिक दल परित्याग गरी दर्जनौँ व्यक्तिले नेपाली कांग्रेस प्रवेश गरेको जानकारी दिइएको छ। कार्यक्रमका प्रमुख अतिथि यादवले चुनाव प्रचारलाई थप प्रभावकारी बनाउने उद्देश्यले पार्टी कार्यालयको उद्घाटन गर्दै रिबन काटेका थिए।
